काठमाडौं । एक्सट्रिम इनर्जी ड्रिंकले नेपाल प्रिमियर लिग (एनपीएल)को फ्रेन्चाइज टोली विराटनगर किंग्ससँग मुख्य प्रायोजन सम्झौता गरेको छ।

सम्झौतापछि विराटनगर किंग्सको जर्सीलगायत टोलीका विभिन्न प्रमुख स्थानमा एक्सट्रिमको लोगो राखिनेछ। एक्सट्रिमसँगको सहकार्यले टोलीको व्यावसायिक तथा खेलकुद यात्रालाई थप मजबुत बनाउने विराटनगर किंग्सले जनाएको छ।

कम्पनीसँगको साझेदारीले टोलीको प्रदर्शनमा समेत सकारात्मक प्रभाव पर्ने अपेक्षा गरिएको छ।

सात टोलीसँग मुख्य प्रायोजन

एक्सट्रिमले एनपीएलको तेस्रो सिजनमा सुदूरपश्चिम रोयल्सबाहेक सातवटै टोलीसँग मुख्य प्रायोजन सम्झौता गरेको छ।

यसअघि एक्सट्रिमले साविक विजेता लुम्बिनी लायन्स, काठमाडौं गोर्खाज, जनकपुर बोल्ट्स, चितवन राइनोज, पोखरा एभेन्जर्स र कर्णाली याक्ससँग पनि मुख्य प्रायोजन सम्झौता गरिसकेको छ।

कम्पनीले एनपीएलमार्फत नेपाली क्रिकेटको विकासमा योगदान पुर्‍याउने उद्देश्य रहेको जनाएको छ। प्रायोजनबाट खेलाडीलाई प्रोत्साहन मिल्नुका साथै प्रतियोगितालाई थप सफल बनाउन सहयोग पुग्ने अपेक्षा गरिएको छ।

Originally published on abcnews.com.np.