काठमाडौं । शुक्रबार सम्पन्न खेलबाट पुरुष तथा महिलातर्फका समूह विजेता र उपविजेताको टुंगो लागेसँगै सेमिफाइनल समीकरण पूरा भएको हो ।

पुरुषतर्फ समूह ‘ए’ बाट एपीएफका क्षितिज खनाल समूह विजेता तथा प्रिन्स दाहाल उपविजेता बन्दै सेमिफाइनल पुगेका छन् । क्षितिजले तीनै खेलमा जित निकाल्दा प्रिन्सले तीनमध्ये दुई खेल जितेका हुन् ।

शुक्रबार क्षितिजले नेपाल पुलिसका सुनिल जोशीलाई २१–९, २१–१२ ले तथा प्रिन्सले पुलिसकै जीवन आचार्यलाई २२–२०, २१–१६ ले पराजित गरे ।

समूह ‘बी’ बाट त्रिभुवन आर्मी क्लबका प्रफुल महर्जन विजेता र नेपाल पुलिसका विष्णु कटुवाल उपविजेता बन्दै सेमिफाइनलमा पुगे । प्रफुलले विष्णुलाई १४–२१, २१–१२, २१–१७ ले पराजित गरे ।

अब फाइनल प्रवेशका लागि क्षितिज खनालले विष्णु कटुवाल तथा प्रफुल महर्जनले प्रिन्स दाहालसँग प्रतिस्पर्धा गर्नेछन् ।

महिलातर्फ समूह ‘ए’ बाट नेपाल नम्बर एक खेलाडी त्रिभुवन आर्मी क्लबकी रसिला महर्जन विजेता तथा नेपाल पुलिसकी शेस्ना श्रीपाली उपविजेता बन्दै सेमिफाइनल पुगे । रसिलाले आर्मीकै अनुमाया राईलाई २१–५, २१–७ ले पराजित गरिन् ।

समूह ‘बी’ बाट एपीएफकी रिहाना सेरचन विजेता र नेपाल पुलिसकी निता लम्साल उपविजेता बन्दै सेमिफाइनलमा पुगे । रिहानाले नितालाई १३–२१, २१–१४, २१–१२ ले पराजित गरिन् ।

महिलातर्फ फाइनल प्रवेशका लागि रसिला महर्जनले निता लम्साल तथा रिहाना सेरचनले शेस्ना श्रीपालीसँग प्रतिस्पर्धा गर्नेछन् ।

यसैबीच, पुरुष यू–११ एकलतर्फ बिराट बस्नेत, सुप्रेन शाही, कृमोन रिजाल, धननारायण श्रेष्ठ, डेनिश थापा, माहिर बाबु श्रीपाली, दीप तामाङ र प्रज्ञान ढकाल अन्तिम आठमा पुगेका छन् ।

महिलातर्फ युमिका राई, रिदिना श्रेष्ठ, इर्याना मगर, योन्जना मगर, अरक्षा डंगोल, देनिशा प्रधान, अर्चना मगर र रेन्शा श्रेष्ठले अन्तिम आठमा स्थान बनाएका छन् ।

Originally published on abcnews.com.np.