काठमाडौं । चितवनको भरतपुरस्थित एक क्लबमा दुई समूहबीच झडप हुँदा चारजना घाइते भएका छन्।

प्रहरीका अनुसार शनिबार बिहान करिब सवा १ बजे भरतपुर महानगरपालिका–३, लायन्सचोकस्थित फायर क्लबमा दुई समूहबीच झगडा तथा कुटपिट भएको हो।

घटनामा संलग्न रहेको आरोपमा भरतपुर–४ का ३२ वर्षीय हिमाल रसाइली पक्राउ परेका छन्। यस्तै, क्लब सञ्चालक भरतपुर–१७ का ३६ वर्षीय राकेश तामाङलाई पनि प्रहरीले नियन्त्रणमा लिएको छ। तामाङलाई भने घटनाबारे सोधपुछ गर्न नियन्त्रणमा लिइएको जिल्ला प्रहरी कार्यालय चितवनका डीएसपी रवीन्द्र खनालले बताएका छन्।

चारजना घाइते

कुटपिटबाट नवलपुरको बौदीकाली गाउँपालिका–१ का १७ वर्षीय मदन क्षेत्री, भरतपुर–१७ का २६ वर्षीय रोहन तामाङ, कालिका नगरपालिका–९ का २३ वर्षीय विशाल मगर र कपिलवस्तुको तौलिहवा नगरपालिका–१ का ३५ वर्षीय मो सरपराज घाइते भएका छन्।

उनीहरूको भरतपुरस्थित नयाँ मेडिकल कलेजमा उपचार भइरहेको छ। प्रहरीका अनुसार घाइतेको अवस्था सामान्यदेखि मध्यम रहेको छ।

घटनाको कारण अहिलेसम्म खुलेको छैन। प्रहरीले कुटपिटमा संलग्न अन्य व्यक्तिको खोजी गर्नुका साथै घटनाबारे थप अनुसन्धान गरिरहेको जनाएको छ।

Originally published on abcnews.com.np.