काठमाडौं । बैंकिङ कसुर मुद्दामा अदालतबाट दुई दिन कैद र १४ लाख रुपैयाँ जरिवाना ठहर भई फरार रहेका एक व्यक्तिलाई प्रहरीले पक्राउ गरेको छ।

पक्राउ पर्नेमा पर्वतको महाशिला गाउँपालिका–५ घर भई हाल काठमाडौंको कागेश्वरी मनहरा नगरपालिका–९ काँडाघारी बस्दै आएका ४० वर्षीय तुलप्रसाद अधिकारी रहेका छन्।

अधिकारीलाई काठमाडौं उपत्यका अपराध अनुसन्धान कार्यालयले मनोहराबाट पक्राउ गरेको हो।

काठमाडौं जिल्ला अदालत, बबरमहलको फैसलाअनुसार नेपाल सरकार वादी र अधिकारी प्रतिवादी रहेको बैंकिङ कसुर मुद्दामा उनलाई दुई दिन कैद र १४ लाख रुपैयाँ जरिवाना हुने ठहर भएको थियो।

अदालतको फैसला कार्यान्वयनका लागि फरार रहेका अधिकारीलाई पक्राउ गरिएको काठमाडौं उपत्यका अपराध अनुसन्धान कार्यालयका प्रवक्ता एवं प्रहरी उपरीक्षक रामेश्वर कार्कीले जानकारी दिए।

प्रहरीका अनुसार पक्राउ परेका अधिकारीलाई फैसला कार्यान्वयनका लागि आजै काठमाडौं जिल्ला अदालत, बबरमहलमा उपस्थित गराइएको छ।

Originally published on abcnews.com.np.