काठमाडौं । नेपाली कांग्रेस संस्थापन इतर समूहको राष्ट्रिय भेलामा पूर्वगृहमन्त्री रमेश लेखकले पार्टीको विधान संशोधनका लागि ४३ बुँदे अवधारणा पत्र प्रस्तुत गरेका छन्।

राष्ट्रिय भेलाको कानुन तथा विधान समिति संयोजकसमेत रहेका लेखकले पार्टीको विधानलाई बदलिँदो राजनीतिक, सामाजिक र प्रविधिगत आवश्यकताअनुसार परिमार्जन गर्नुपर्ने बताएका छन्।

उनले संविधानले अंगीकार गरेको संघीय लोकतान्त्रिक गणतन्त्र तथा समानुपातिक समावेशी सिद्धान्तलाई पार्टी संगठनमा प्रभावकारी रूपमा लागू गर्नुपर्नेमा जोड दिएका छन्। संघीय संरचनाअनुसार स्थानीय, प्रदेश र केन्द्रीय तहबीच अधिकार तथा जिम्मेवारी स्पष्ट गर्नुपर्ने उनको प्रस्ताव छ।

सदस्यता प्रणाली डिजिटल बनाउन प्रस्ताव

लेखकले साधारण तथा क्रियाशील सदस्यसम्बन्धी व्यवस्था पुनरावलोकन गर्नुपर्ने सुझाव दिएका छन्। सदस्यता स्वघोषणाका आधारमा प्राप्त गर्न सकिने तथा डिजिटल प्रणालीमार्फत सदस्यता लिन, नवीकरण गर्न र हटाउन सकिने व्यवस्था गर्नुपर्ने उनको प्रस्ताव छ।

विदेशस्थित जनसम्पर्क समितिका सदस्यको सदस्यता सम्बन्धित देशको समितिमा सूचीकृत गरी केन्द्रीय कार्यालयमा अभिलेख राख्ने व्यवस्था गर्न पनि उनले सुझाव दिएका छन्।

समावेशी प्रतिनिधित्वमा जोड

लेखकले पार्टीका सबै तहमा महिला, दलित, जनजाति, क्षेत्र तथा विभिन्न समुदायको प्रतिनिधित्व सुनिश्चित गर्नुपर्ने बताएका छन्।

टोल कार्यसमितिमा भूगोल र जनसंख्याका आधारमा पदाधिकारी तथा सदस्य संख्या निर्धारण गर्नुपर्ने तथा वडा समितिमा न्यूनतम क्रियाशील सदस्य संख्या तोक्नुपर्ने उनको सुझाव छ।

आन्तरिक लोकतन्त्र र पारदर्शितामा जोड

लेखकले पार्टीभित्र आन्तरिक लोकतन्त्र बलियो बनाउन पारदर्शी निर्णय प्रक्रिया, योग्यता तथा योगदानमा आधारित मूल्यांकन प्रणाली र अनुशासित कार्यकर्तापंक्ति आवश्यक रहेको बताएका छन्।

उनले कांग्रेसको ऐतिहासिक योगदान स्मरण गर्दै पार्टीलाई समयअनुकूल पुनर्गठन गर्न विधान संशोधन आवश्यक रहेको धारणा राखेका छन्। विशेषगरी सूचना प्रविधिको विकास, बदलिँदो सामाजिक–आर्थिक परिवेश र नागरिकका अपेक्षालाई ध्यानमा राखेर पार्टी संरचना चुस्त बनाउनुपर्ने उनको प्रस्ताव छ।

Originally published on abcnews.com.np.