काठमाडौँ । नेपाली कांग्रेसका नेता एवं पूर्वपरराष्ट्रमन्त्री एनपी साउदले पार्टीले विगतका गल्ती स्वीकार गर्दै जनतासमक्ष आत्मसमीक्षा गर्नुपर्ने बताएका छन्।

नेपाली कांग्रेस संस्थापन इतर समूहको राष्ट्रिय भेलामा ‘मुलुकको समसामयिक विषयको प्रस्ताव’ प्रस्तुत गर्दै साउदले आत्मसमीक्षा कमजोरी नभई सुधारको पहिलो आधार भएको बताएका हुन्।

उनले कांग्रेसले जनतासँग इमानदारीपूर्वक आफ्ना गल्ती स्वीकार गर्दै त्यसबाट सिक्ने प्रतिबद्धता व्यक्त गर्नुपर्ने उल्लेख गरेका छन्।

‘कांग्रेसले जनतासँग इमानदारीपूर्वक भन्न सक्नुपर्छ—हामीले पनि गल्ती गरेका छौँ, तर हामी आफ्ना गल्तीबाट सिक्छौँ र लोकतन्त्र, संविधान तथा जनताको अधिकारलाई अझ बलियो बनाउने जिम्मेवारीबाट पछि हट्दैनौँ,’ साउदले प्रस्तावमा भनेका छन्।

उनका अनुसार यस्तो स्वीकारोक्तिले पार्टीलाई कमजोर नभई अझ विश्वसनीय बनाउनेछ।

संसद्मा कांग्रेसको भूमिका कमजोर

साउदले संसद्मा कांग्रेसको उपस्थिति र प्रभावकारिता कमजोर हुँदै गएको टिप्पणी गरेका छन्। सत्ताको छायामा कांग्रेस परेको अनुभूति हुन थालेको उनको भनाइ छ।

‘संसदीय फाँटमा नेपाली कांग्रेसको उपस्थिति र प्रभावकारिता कमजोर छ। सत्ताको छायामा कांग्रेस परेको अनुभूति हुँदै छ,’ उनले भनेका छन्।

संसद्मा संख्यात्मक रूपमा कमजोर हुँदैमा कांग्रेसको राजनीतिक भूमिका समाप्त नहुने भन्दै उनले राष्ट्रिय मुद्दामा प्रभावकारी वैकल्पिक दृष्टिकोण प्रस्तुत गर्न नसक्नु अझ ठूलो चुनौती भएको उल्लेख गरेका छन्।

प्रमुख प्रतिपक्षका रूपमा कांग्रेसले सरकारका कमजोरी मात्र औँल्याउने नभई जनतालाई विश्वास दिलाउने वैकल्पिक नीति तथा कार्यक्रमसमेत प्रस्तुत गर्नुपर्ने उनको धारणा छ।

साउदले संख्यात्मक कमजोरीसँगै राष्ट्रिय मुद्दामा प्रभावकारी हस्तक्षेप गर्न नसक्ने अवस्था आएमा प्रमुख प्रतिपक्षका रूपमा पार्टीको प्रभाव अझ कमजोर हुने चेतावनीसमेत दिएका छन्।

Originally published on abcnews.com.np.