काठमाडौं । भारतको सर्वोच्च अदालतले हास्य कलाकार समय रैनासहित पाँच जनाविरुद्ध दायर गरिएको मुद्दा खारेज गरेको छ।

‘इन्डियाज गट लेटेन्ट’ कार्यक्रममा अपांगता भएका व्यक्तिमाथि टिप्पणी गरेको र मजाक उडाएको आरोपमा रैनासहित पाँच जनाविरुद्ध मुद्दा दायर गरिएको थियो। सर्वोच्च अदालतले शुक्रबार उक्त मुद्दा खारेज गरेको हो।

मुद्दा खारेज हुनेमा समय रैना, विपुल गोयल, बलराज परमजीत सिंह घई, सोनाली ठक्कर र निशान्त जगदीश तंवर छन्।

भारतीय सञ्चारमाध्यम दैनिक भास्करका अनुसार सर्वोच्च अदालतले अपांगता भएका व्यक्तिबारे जागरूकता फैलाउन तथा कोष जुटाउन उनीहरूले गरेको प्रयासको प्रशंसा गरेको छ। अदालतले उनीहरूलाई प्रतिभाशाली युवा कलाकारसमेत भनेको छ।

अदालतले अपांगता भएका व्यक्तिका लागि जागरूकता र कोष जुटाउने उनीहरूको प्रयास प्रशंसनीय रहेको उल्लेख गर्दै आफ्नो ऊर्जा सकारात्मक दिशामा प्रयोग गर्दा त्यसले सकारात्मक परिणाम दिन सक्ने बताएको छ।

Originally published on abcnews.com.np.