काठमाडौँ । अविरल वर्षासँगै आएको बाढीपहिरोका कारण देशका विभिन्न सडकखण्डमा यातायात प्रभावित भएको छ। केही सडक पूर्ण रूपमा अवरुद्ध छन् भने केहीमा निश्चित समयका लागि सवारीसाधन सञ्चालनमा रोक लगाइएको छ।

प्रहरी प्रधान कार्यालयले आज बिहान ६ः३० बजेसम्मको विवरण सार्वजनिक गर्दै विभिन्न जिल्लाका सडकमा यातायात प्रभावित भएको जनाएको छ।

यी सडकमा समस्या

बिपी राजमार्ग : काभ्रेपलाञ्चोक–सिन्धुली जोड्ने बिपी राजमार्गको खुर्कोट–नेपालथोक–कटुन्जेबेँसी सडकखण्डमा बाढीको जोखिमलाई ध्यानमा राखेर हरेक दिन साँझ ६ बजेदेखि बिहान ४ बजेसम्म सबै सवारीसाधनको आवागमन रोकिएको छ। बिहान ४ बजेदेखि बेलुका ६ बजेसम्म भने यातायात सञ्चालन हुनेछ।

कान्ति लोकपथ : मकवानपुरमा वर्षाका कारण अपराह्न ५ बजेदेखि बिहान ५ बजेसम्म सबै प्रकारका सवारीसाधन सञ्चालनमा रोक लगाइएको छ।

मेची राजमार्ग : इलाम नगरपालिका–९ राजदुवालीमा हिलोका कारण मेची राजमार्ग पूर्ण रूपमा अवरुद्ध भएको छ। उक्त स्थानमा वैकल्पिक सडक रहेको प्रहरीले जनाएको छ।

अरनिको राजमार्ग : सिन्धुपाल्चोकको भोटेकोशी गाउँपालिका–४ चारकिलो पहिरो लिपिङमा सडक भासिँदा अरनिको राजमार्ग पूर्ण रूपमा अवरुद्ध भएको छ।

त्रिशूली–मैलुङ–स्याफ्रुबेँसी सडक : रसुवाको उत्तरगया गाउँपालिका–५ खाल्टेमा सडक कटान हुँदा सडकखण्ड पूर्ण रूपमा अवरुद्ध भएको छ।

भेरी करिडोर : रुकुम पश्चिमको आठबिसकोट नगरपालिका–६ रिजेगार्ड खोला नजिक पहिरो खस्दा जाजरकोट–डोल्पा सडक पूर्ण रूपमा अवरुद्ध भएको छ।

मध्यपहाडी लोकमार्ग : रुकुम पूर्वको भूमे गाउँपालिका–४ काडाबगर र धौलापहिरामा पहिरो खस्दा मध्यपहाडी लोकमार्ग अवरुद्ध भएको छ।

घोराही–थबाङ सहिद मार्ग : रोल्पाको थबाङ गाउँपालिका–२ लाप्लेभिर र दबाङमा भूक्षय तथा पहिरोका कारण सडक दुई स्थानमा पूर्ण रूपमा अवरुद्ध भएको छ।

प्रहरीका अनुसार अवरुद्ध सडक खुलाउन सम्बन्धित निकाय तथा स्थानीय तहसँग समन्वय भइरहेको छ। निरन्तर वर्षा भइरहेकाले यात्रु तथा सवारी चालकलाई सडकको पछिल्लो अवस्थाबारे जानकारी लिएर मात्र यात्रा गर्न आग्रह गरिएको छ।

Originally published on abcnews.com.np.