काठमाडौँ । देशका विभिन्न स्थानमा शनिबार (साउन ३०) दिउँसो वर्षा भएको छ। जल तथा मौसम विज्ञान विभागका अनुसार केही क्षेत्रमा मध्यमदेखि भारी वर्षा भएको छ।

विभागका अनुसार शनिबार दिउँसो ३ बजे गरिएको मापनमा सिन्धुपाल्चोकको बोल्डे, ढुंगे तथा आसपासका क्षेत्रमा पछिल्लो तीन घण्टामा मध्यमदेखि भारी वर्षा भएको हो। बाढी पूर्वानुमान महाशाखाले ती क्षेत्रमा अझै थप वर्षा हुनसक्ने पूर्वानुमान गरेको छ।

महाशाखाले वर्षाका कारण स्थानीय खोलाहरूमा पानीको बहाव अचानक बढ्न सक्ने तथा बाढी र पहिरोको जोखिम बढेको जनाएको छ। सम्भावित जोखिमलाई ध्यानमा राख्दै स्थानीयवासीलाई आवश्यक सतर्कता अपनाउन आग्रह गरिएको छ।

बाढी पूर्वानुमान महाशाखाले सिन्धुपाल्चोकका विभिन्न खोलामा पानीको सतह बढ्नसक्ने भएकाले स्थानीय बासिन्दा, जनप्रतिनिधि तथा सम्बन्धित निकायलाई उच्च सतर्कता अपनाउन अनुरोध गरेको छ।

लगातार वर्षा भइरहेमा तल्लो तटीय क्षेत्रमा डुबान तथा पहाडी क्षेत्रमा पहिरोको जोखिम बढ्नसक्ने भएकाले जोखिमयुक्त स्थानमा रहेका नागरिकलाई समयमै सुरक्षित स्थानतर्फ सर्नसमेत महाशाखाले आग्रह गरेको छ।

वर्षा भइरहेका क्षेत्रमा खोला तथा नदीको किनारमा नजान, जोखिमपूर्ण सडक तथा पहिरो सम्भावित क्षेत्रमा आवतजावत गर्दा विशेष सावधानी अपनाउन र मौसम तथा बाढीसम्बन्धी पछिल्ला सूचनामा अद्यावधिक रहनसमेत आग्रह गरिएको छ।

Originally published on abcnews.com.np.