काठमाडौँ । नेपाली कांग्रेसका नेता दीपक खड्काले सभापति गगनकुमार थापासहितको वर्तमान नेतृत्व जनमतबाट अस्वीकृत भइसकेको दाबी गर्दै पूर्वसभापति शेरबहादुर देउवाको आलोचना गर्नुभन्दा आत्मसमीक्षा गर्न आग्रह गरेका छन्।

शनिबार काठमाडौँमा आयोजित कांग्रेस संस्थापन इतर समूहको राष्ट्रिय भेलाका क्रममा सञ्चारकर्मीसँग कुरा गर्दै खड्काले निर्वाचनमा पराजित भएकाहरूले नै पार्टीको नेतृत्व र विगतका नेतामाथि प्रश्न उठाइरहनु उचित नभएको टिप्पणी गरे।

उनले शेरबहादुर देउवाको नेतृत्वको बचाउ गर्दै देउवा स्वयं कुनै निर्वाचनमा पराजित नभएको र जनमतको सम्मान गर्दै आएको दाबी गरे। कांग्रेसभित्रको आन्तरिक विवाद र कलहकै कारण पार्टी कमजोर अवस्थामा पुगेको उनको आरोप थियो।

‘जनताले उहाँहरूको पूरै कार्यसमितिलाई नै पराजित गराइदिएका छन्। जनताबाट अस्वीकृत भइसकेपछि पनि के आधारमा दाबी गरिँदै छ ? निर्वाचनमा जनताले दिएको उत्तरलाई स्वीकार गर्नुपर्छ,’ खड्काले भने।

उनका अनुसार कांग्रेसको आन्तरिक विवाद केवल पार्टीको समस्या नभई मुलुककै लोकतान्त्रिक राजनीतिक प्रणालीसँग जोडिएको विषय हो। कांग्रेस कमजोर हुँदा त्यसको असर देशको राजनीतिक स्थायित्व र लोकतान्त्रिक व्यवस्थामै पर्ने उनले बताए।

‘कांग्रेस कमजोर हुँदा मुलुक पनि कमजोर हुन्छ भन्ने कुरा आमजनताले बुझिसकेका छन्,’ उनले भने, ‘त्यसैले नेताहरूले आपसमा बसेर छलफल गरी पार्टीलाई बलियो बनाउनुपर्छ।’

पाँच वर्ष संगठन सुदृढीकरणमा लाग्नुपर्ने सुझाव

खड्काले अब नेतृत्व विवाद र आरोप–प्रत्यारोपमा समय खर्च गर्नुभन्दा आगामी पाँच वर्ष पार्टी संगठन सुदृढीकरणमा केन्द्रित हुनुपर्ने बताए।

उनले जनतामा कांग्रेसप्रति पुनः विश्वास निर्माण गर्ने, संगठनलाई गाउँ तहसम्म मजबुत बनाउने र विगतका कमजोरीबाट पाठ सिकेर अघि बढ्नुपर्नेमा जोड दिए।

संस्थापन पक्षका नेताहरूले समेत आफ्ना गल्ती स्वीकार गरी पार्टीलाई एकढिक्का बनाउन पहल गर्नुपर्ने उनको आग्रह थियो।

कांग्रेसभित्र विशेष महाधिवेशनबाट गगन थापा नेतृत्वको कार्यसमिति बनेपछि पार्टीको वैधानिकता, नेतृत्व र आगामी महाधिवेशनलाई लिएर दुई पक्षबीच विवाद चर्किएको छ। संस्थापन इतर समूहको राष्ट्रिय भेलामा पनि यही विवादका साथै कांग्रेसको कमजोर निर्वाचन परिणाम, संगठन पुनर्निर्माण र आगामी राजनीतिक रणनीतिबारे तीव्र बहस भइरहेको छ।

Originally published on abcnews.com.np.