ढल्केबर, साउन ३० गते । प्रतिनिधि सभाकी उपसभामुख रुबी ठाकुरले दाइजो प्रथा अन्त्य गर्न सामूहिक प्रयास आवश्यक रहेको बताउनुभएको छ।

धनुषाको ढल्केबरमा शनिबार नाई सहयोग संस्था नेपालको दोस्रो अधिवेशन तथा चौथो साधारण सभाको उद्घाटन गर्दै उहाँले दाइजो प्रथाले समाजमा अन्याय र विभेद बढाउने भएकाले यसको अन्त्यका लागि सबै पक्ष एकजुट हुनुपर्ने बताउनुभयो।

उपसभामुख ठाकुरले दाइजो प्रथा अन्त्य गर्दै ठाकुर समुदायलाई सामाजिक तथा राजनीतिक रूपमा अघि बढाउन पारस्परिक सहयोग र एकता आवश्यक रहेको बताउनुभयो। समुदायबीच एकता र सहयोग भए मात्र समाजको प्रतिष्ठा र विकास सम्भव हुने उहाँको भनाइ थियो।

दाइजो प्रथाविरुद्ध आफूले निरन्तर आवाज उठाउँदै आएको उल्लेख गर्दै उपसभामुख ठाकुरले दाइजो लिनेदिने तथा दाइजोका लागि दबाब दिने कार्य कानुनविपरीत हुने बताउनुभयो।

उहाँले भन्नुभयो, “छोरीको विवाह गर्दा दाइजो नदिनुहोस्, छोराको विवाह गर्दा दाइजो नलिनुहोस्।”

दाइजोका कारण अन्याय भए सहयोग गर्ने प्रतिबद्धता

दाइजोका कारण कसैमाथि दबाब वा अन्याय भए तत्काल आफूलाई जानकारी गराउन आग्रह गर्दै उपसभामुख ठाकुरले त्यस्ता विषयमा आवश्यक पहल गर्ने प्रतिबद्धता जनाउनुभयो।

उहाँले नाई सहयोग संस्था नेपालको अधिवेशन सफलताको शुभकामना दिँदै सामाजिक सुधार र समुदायको हितमा संस्थाले प्रभावकारी भूमिका खेल्ने विश्वास व्यक्त गर्नुभयो।

कार्यक्रममा सिरहा नाई समाजका तर्फबाट श्यामकुमार ठाकुरले हजाम (ठाकुर) समुदायको सामाजिक, आर्थिक, शैक्षिक तथा राजनीतिक उत्थानका साथै राज्यका विभिन्न निकायमा समुदायको प्रतिनिधित्व सुनिश्चित गर्न माग गर्दै उपसभामुख ठाकुरलाई ज्ञापनपत्र बुझाउनुभएको थियो।