राजमार्गमा हुने दुर्घटनामा घाइते हुनेको उपचारलाई प्राथमिकता दिँदै ट्रमा युनिट सञ्चालन गर्न लागिएको मन्त्री मेहताले बताउनुभयो। शनिबार लहानमा आयोजित कार्यक्रममा उहाँले पूर्ण क्षमताको ट्रमा सेन्टर निर्माणका लागि विस्तृत परियोजना प्रतिवेदन (डीपीआर), भवन निर्माण र विशेषज्ञ चिकित्सक व्यवस्थापन गर्न समय लाग्ने भएकाले तत्काल ट्रमा युनिटमार्फत सेवा सुरु गर्न लागिएको जानकारी दिनुभयो।

“ट्रमा सेन्टर दीर्घकालीन प्रक्रिया हो। तर लहान राजमार्गमा अवस्थित भएकाले यहाँ उपलब्ध पूर्वाधारको उपयोग गर्दै तत्काल ट्रमा युनिट सुरु गर्न सक्छौँ।”

मन्त्री मेहताका अनुसार लहान अस्पतालमा सिटी स्क्यान, ब्लड बैंक तथा आँखा अस्पतालजस्ता पूर्वाधार उपलब्ध छन्। प्रदेश सरकारले हालै २९ जना विशेषज्ञ चिकित्सक पठाइसकेको जानकारी दिँदै उहाँले सिटी स्क्यान सञ्चालनमा रेडियोलोजिस्टको अभाव देखिएको बताउनुभयो।

ट्रमा युनिटका लागि अर्थोपेडिक सर्जन र एनेस्थेसिया विशेषज्ञसहित आवश्यक चिकित्सकीय जनशक्ति व्यवस्थापन गरिने उहाँले बताउनुभयो।

स्वास्थ्य बीमा बन्द भएको छैन

मन्त्री मेहताले स्वास्थ्य बीमा कार्यक्रम पूर्ण रूपमा बन्द नभएको स्पष्ट पार्नुभयो। उहाँका अनुसार निजी अस्पतालमा बीमा सेवा रोकिए पनि सरकारी अस्पतालमा सेवा यथावत् रहेको छ।

करिब ९३ प्रतिशत नागरिक सरकारी अस्पतालमा निर्भर रहेको भन्दै उहाँले स्वास्थ्य बीमालाई प्रभावकारी बनाउने गरी सरकारले काम गरिरहेको बताउनुभयो।

विगतको करिब १८ अर्ब रुपैयाँ बक्यौतामध्ये फागुनसम्मको भुक्तानी भइसकेको जानकारी दिँदै उहाँले बीमाका केही प्याकेज अवैज्ञानिक रहेकाले पुनरावलोकन भइरहेको बताउनुभयो।

सर्पदंशको औषधि आइपुग्यो

तराई क्षेत्रमा देखिएको एन्टी स्नेक भेनमको अभावबारे मन्त्री मेहताले काठमाडौँमा ८ हजार ५ सय भायल औषधि आइपुगेको जानकारी दिनुभयो।

उहाँका अनुसार आइतबारदेखि देशका विभिन्न भागमा औषधि वितरण सुरु गरिनेछ। केही अस्पताल तथा सैनिक क्याम्पमा मौज्दात घटे पनि देशभर पूर्ण अभाव हुन नदिने गरी व्यवस्थापन भइरहेको उहाँले बताउनुभयो।