काठमाडौं । लगातारको वर्षाका कारण आज साउन ३१ गते देशका विभिन्न जिल्लामा आकस्मिक बाढीको जोखिम रहेको बाढी पूर्वानुमान महाशाखाले जनाएको छ।

महाशाखाका अनुसार सिन्धुपाल्चोक, रसुवा, नुवाकोट, गोरखा, धादिङ, काठमाडौं, भक्तपुर, ललितपुर, काभ्रेपलाञ्चोक, मकवानपुर, तनहुँ, लमजुङ, कास्की, पर्वत, म्याग्दी, बागलुङ, स्याङ्जा, पाल्पा, जाजरकोट, रुकुम पश्चिम, सुर्खेत, बाँके, बर्दिया, बैतडी, डोटी, डडेल्धुरा, कैलाली र कञ्चनपुरमा बाढीको जोखिम रहेको छ।

यी जिल्लाहरू हुँदै बहने साना नदी तथा खोलामा पानीको बहाव केही समयका लागि उल्लेख्य रूपमा बढ्न सक्ने र आकस्मिक बाढीको मध्यम जोखिम रहेको महाशाखाले जनाएको छ।

नदीकिनारमा सतर्कता अपनाउन आग्रह

लगातारको वर्षाका कारण नदी तथा खोलाको जलस्तर अचानक बढ्न सक्ने भएकाले नदीकिनार र तटीय क्षेत्रमा विशेष सतर्कता अपनाउन महाशाखाले आग्रह गरेको छ।

साना खोला तथा नदी आसपासका बस्तीमा जोखिम बढी रहेकाले स्थानीयवासीलाई आवश्यक सुरक्षा उपाय अपनाउन तथा नदीकिनारमा हुने गतिविधि सीमित गर्न अनुरोध गरिएको छ।

Originally published on abcnews.com.np.