काठमाडौं । अर्थमन्त्री डा. स्वर्णिम वाग्लेले प्रवासमा रहेका नेपालीलाई नेपालमा ढुक्क भएर लगानी गर्न आग्रह गरेका छन्।

चीनको ग्वाङ्झाउमा सुरु भएको गैरआवासीय नेपाली सङ्घ (एनआरएनए) को ११औँ एसिया प्यासेफिक सम्मेलनलाई भिडियो सन्देशमार्फत सम्बोधन गर्दै अर्थमन्त्री वाग्लेले सरकारले लगानीको वातावरण निर्माण गरिरहेको बताए।

उनले देशमै रोजगारी सिर्जना गर्ने तथा एआई र सूचना प्रविधिको क्षेत्रमा काम गर्न प्रोत्साहन गर्ने गरी सरकारले नीतिगत रणनीति कार्यान्वयन गरिरहेको जानकारी दिए।

“सरकारले लगानीको माहोल बनाइरहेको छ। देशमै रोजगारीको वातावरण सिर्जना गर्ने वातावरण भइरहेको छ,” उनले भने, “एआई र सूचना प्रविधि क्षेत्रमा काम गर्न प्रोत्साहन गर्ने गरी नीतिगत रणनीतिहरू कार्यान्वयन भइरहेका छन्। त्यसैले नेपालमा ढुक्क भएर लगानी गर्न प्रवासी नेपालीहरूलाई आग्रह गर्दछु।”

पर्यटन, सूचना प्रविधि र ऊर्जामा लगानी गर्न आग्रह

अर्थमन्त्री वाग्लेले प्रवासी नेपालीलाई पर्यटन, सूचना प्रविधि, हरित ऊर्जा, उच्च मूल्ययुक्त कृषि तथा आयात प्रतिस्थापन हुने क्षेत्रमा लगानी गर्न आग्रह गरे।

“प्रवासी साथीहरू, अब नेपाल आएर ढुक्कसँग नेपालमा लगानी गर्नुहोस्। पर्यटन, सूचना प्रविधि, हरित ऊर्जा, उच्च मूल्ययुक्त कृषिमा र आयात प्रतिस्थापन हुने क्षेत्रमा लगानी गर्नुहोस्,” उनले भने।

सरकारले नतिजा देखिने गरी तीव्र गतिमा काम गरिरहेको दाबी गर्दै उनले बजेटमार्फत २७ वटा नयाँ कानुन ल्याएर लगानीमैत्री वातावरण निर्माण गर्ने प्रयास गरिएको बताए।

रोजगारी सिर्जनामा जोड

अर्थमन्त्री वाग्लेले सरकारले सम्मानजनक रोजगारी सिर्जनालाई प्राथमिकता दिएको बताए। देशमा रोजगारीका अवसर विस्तार गर्दै युवालाई स्वदेशमै काम गर्ने वातावरण बनाउन सरकार केन्द्रित रहेको उनको भनाइ छ।

सरकारको आम्दानी बढाउन कर प्रणालीमा सुधार गरिएको उल्लेख गर्दै उनले बजेटमार्फत आर्थिक राजकाजको दिशा परिवर्तन गर्ने प्रयास गरिएको बताए।

“पहिलो वर्ष सुधारको सुरुआत मात्रै गरेका छौँ,” वाग्लेले भने।

Originally published on abcnews.com.np.