काठमाडौं । नेकपा एमालेका अध्यक्ष केपी शर्मा ओलीले प्रधानमन्त्री बालेन्द्र शाह नेतृत्वको सरकारबाट देश सञ्चालन हुन नसक्ने टिप्पणी गर्नुभएको छ। इलाममा लोकतान्त्रिक आदिवासी जनजाति महासङ्घको केन्द्रीय कमिटी बैठकलाई सम्बोधन गर्दै उहाँले सरकारको कार्यशैलीप्रति तीव्र असन्तुष्टि व्यक्त गर्नुभएको हो।

अध्यक्ष ओलीले आफू र अन्य नेतामाथि सरकारले प्रतिशोध साँधेको आरोप लगाउनुभयो। सरकारले आफूलाई पक्राउ गर्नुका साथै रमेश लेखक लगायतका नेताहरूलाई समेत पक्राउ गरेको र झुटा मुद्दा लगाउने प्रयास गरेको उहाँको दाबी थियो।

उहाँले सरकारले गठन गरेको सम्पत्ति छानबिन आयोगप्रति समेत प्रश्न उठाउनुभयो। कानुनको प्रयोगमा विभेद गरिएको दाबी गर्दै ओलीले आफूहरूमाथि मात्रै सम्पत्तिको स्रोत खोज्ने काम भएको आरोप लगाउनुभयो।

“१९० तोला सुनको पनि खोजबिन गर्न नपाइने। हाम्रो चाहिँ यो लगाएको कपडा कुन पैसाले किनेको छ भनेर सोध्ने? यो स्टकोट कहाँबाट आयो? कुन टेलरले सिलाएको? धागो कहाँबाट ल्याइयो? मेसिनले सिलाइसक्यो कि हातले सिलाइसक्यो भनेर खोज्ने?” उहाँले प्रश्न गर्नुभयो।

ओलीले सरकारका निकायमा आफू अनुकूल व्यक्तिलाई नियुक्त गरिएको आरोपसमेत लगाउनुभयो। जानकार तथा सक्षम व्यक्तिलाई हटाएर आफ्ना निकट व्यक्तिलाई नियुक्त गर्ने काम भएको उहाँको दाबी थियो।

‘सरकारले आफैँ साम्प्रदायिक विद्वेष भड्कायो’

अध्यक्ष ओलीले सुनसरीमा सरकारले आफैँ साम्प्रदायिक विद्वेष र हिंसा भड्काएको आरोप पनि लगाउनुभयो।

“आफैँ विद्वेष, झगडा लगाउन खोज्ने। गोलबजार, सुनसरीमा विभिन्न किसिमको हिंसा भड्काइयो। आफ्ना कार्यकर्ता भेला गरेर फेरि एउटा सम्झौता गरेर अनि आन्दोलन साम्य पारे”, उहाँले भन्नुभयो।

ओलीले सरकारको पछिल्लो गतिविधिले मुलुकमा अस्थिरता र द्वन्द्व बढाउने काम गरेको दाबी गर्नुभयो। आफूहरू विचलित हुनुपर्ने अवस्था नरहेको उल्लेख गर्दै उहाँले देश निर्माणमा सबै एकजुट हुनुपर्ने बताउनुभयो।

उहाँले प्रधानमन्त्री शाहले नेपालले पनि भारतको सीमा मिचेको भन्ने अभिव्यक्ति दिएको भन्दै त्यसप्रति समेत आपत्ति जनाउनुभयो।

Originally published on abcnews.com.np.