काठमाडौं । नेपाली सेनाप्रमुख अशोकराज सिग्देलको निमन्त्रणामा भारतीय स्थल सेनाध्यक्ष धीरज सेठ आज नेपाल भ्रमणमा आउँदै छन्। चारदिने भ्रमणका क्रममा उनी आइतबार अपराह्न काठमाडौं आइपुग्ने भएका छन्।

नेपाली सेनाका प्रवक्ता राजाराम बस्नेतका अनुसार सोमबार राष्ट्रपति कार्यालयमा विशेष समारोह आयोजना गरी राष्ट्रपति एवं नेपाली सेनाका परमाधिपति रामचन्द्र पौडेलले भारतीय प्रधानसेनापति सेठलाई नेपाली सेनाको मानार्थ महारथीको दर्ज्यानी चिह्न प्रदान गर्ने कार्यक्रम छ।

सोही दिन जङ्गी अड्डामा नेपाली र भारतीय प्रधानसेनापतिबीच द्विपक्षीय वार्ता हुनेछ। वार्तामा दुई देशबीचको सैन्य सहकार्य, तालिम, संयुक्त अभ्यास तथा आपसी सम्बन्धका विषयमा छलफल हुने अपेक्षा गरिएको छ।

नेपाल र भारतका सेनाबीच लामो समयदेखि घनिष्ठ तथा ऐतिहासिक सम्बन्ध रहँदै आएको छ। दुवै देशका सेनाबीच उच्चस्तरीय भ्रमण, संयुक्त सैन्य अभ्यास, तालिम तथा अनुभव आदानप्रदान हुँदै आएको छ।

१९५० देखि मानार्थ महारथीको परम्परा

नेपाल र भारतका सेनाप्रमुखलाई एकअर्काको सेनाको मानार्थ महारथीको पदवी प्रदान गर्ने परम्परा सन् १९५० देखि सुरु भएको हो।

यस परम्पराअनुसार नेपाली प्रधानसेनापतिलाई भारतीय सेनाको मानार्थ महारथी तथा भारतीय स्थल सेनाध्यक्षलाई नेपाली सेनाको मानार्थ महारथीको पदवी प्रदान गरिँदै आएको छ। दुई देशका सेनाबीचको पारस्परिक सम्मान र मैत्रीपूर्ण सम्बन्धको प्रतीकका रूपमा यो परम्परालाई लिइन्छ।

Originally published on abcnews.com.np.