गण्डकी । गृहमन्त्री सुधन गुरुङ आफ्नो गृहजिल्ला गोरखामा पुगेर नागरिकका समस्या र गुनासा सुन्न व्यस्त छन्। आफ्नो निर्वाचन क्षेत्र गोरखा–१ अन्तर्गतका विभिन्न स्थानमा पुगेर उनले स्थानीयस्तरमा भइरहेका विकास गतिविधि, सार्वजनिक सेवा प्रवाह र सुरक्षा अवस्थाबारे जानकारी लिइरहेका छन्।

शुक्रबार गोरखा पुगेका गृहमन्त्री गुरुङले विभिन्न विकास आयोजनाको अनुगमन गर्नुका साथै जिल्लाको सुरक्षा अवस्थाबारे जानकारी लिएका छन्। प्रमुख जिल्ला अधिकारी तुलसीबहादुर श्रेष्ठका अनुसार गृहमन्त्रीको जिल्लामा कुनै औपचारिक कार्यक्रम छैन। निर्वाचन क्षेत्र भ्रमणका क्रममा उनले नागरिकसँग प्रत्यक्ष भेटघाट र संवाद गरिरहेका छन्।

शनिबार भीमसेन थापा गाउँपालिकाका स्थानीयवासीले सुकुम्बासी व्यवस्थापन, नदी डुबानलगायतका समस्या गृहमन्त्रीसमक्ष राखेका थिए। जवाफमा गुरुङले नागरिकका समस्या र गुनासा समाधानका लागि आवश्यक पहल गर्ने प्रतिबद्धता जनाएका छन्।

सडकदेखि मल अभावसम्मका गुनासा

स्थानीयवासीसँगको भेटघाटमा सडक पूर्वाधार, खानेपानी, विद्युत्, सुरक्षा, रासायनिक मलको अभाव, विपद् व्यवस्थापन र सार्वजनिक सेवा प्रवाहलगायत विषयमा छलफल भएको छ।

गृहमन्त्री गुरुङले नागरिकले भोग्दै आएका समस्या पहिचान गरी सम्बन्धित निकायमार्फत यथाशीघ्र समाधान गर्न सरकार प्रतिबद्ध रहेको बताए। उनले शान्ति सुव्यवस्था कायम गर्दै राज्यबाट प्राप्त हुने सेवासुविधा छिटो, छरितो र पारदर्शी ढङ्गले नागरिकसम्म पुर्‍याउने प्रतिबद्धता पनि व्यक्त गरे।

गृहमन्त्री गुरुङ आइतबारसम्म आफ्नो निर्वाचन क्षेत्रमा रहने जनाइएको छ।

Originally published on abcnews.com.np.