लाबुआन । इन्डोनेसियाको पूर्वी क्षेत्रमा गएको ७.७ म्याग्निच्युडको शक्तिशाली भूकम्पपछि उद्धार टोलीले भग्नावशेष र पहिरोमा पुरिएका मानिसको खोजी तीव्र पारेका छन्।

भूकम्पमा परी कम्तीमा ४७ जनाको मृत्यु भएको छ भने एक सयभन्दा बढी घाइते भएका छन्। हजारौँ मानिस घरबारविहीन भएर विस्थापित भएका छन्।

राष्ट्रिय विपद् व्यवस्थापन निकायका अनुसार मङ्गराई क्षेत्रमा २४ जना र पूर्वी मङ्गराईमा १७ जनाको मृत्यु भएको छ। सिक्का, न्गाडा र एन्डे क्षेत्रमा पनि मानवीय क्षति भएको जनाइएको छ।

समुद्रको सतह नजिक केन्द्रबिन्दु

अमेरिकी भूगर्भ सर्वेक्षण (यूएसजीएस) का अनुसार भूकम्प पूर्वी नुसा तेङ्गारा प्रान्तको एन्डेबाट उत्तर–उत्तरपश्चिमतर्फ ६८ किलोमिटर टाढा केन्द्रबिन्दु भएर गएको थियो। भूकम्पको केन्द्र समुद्र सतहदेखि करिब १० किलोमिटर गहिराइमा रहेको थियो।

भूकम्पले फ्लोरेस टापुको अधिकांश भाग हल्लाएको थियो। यसको धक्का छिमेकी पश्चिमी नुसा तेङ्गारा तथा दक्षिणी सुलावेसीका केही क्षेत्रमा समेत महसुस गरिएको थियो।

नौ सयभन्दा बढी घर ध्वस्त

विपद् व्यवस्थापन निकायका अनुसार भूकम्पबाट नौ सयभन्दा बढी घर पूर्ण रूपमा ध्वस्त भएका छन् भने करिब चार सय ५० घरमा आंशिक क्षति पुगेको छ। करिब पाँच हजार मानिस अस्थायी आश्रयस्थलमा बस्न बाध्य भएका छन्।

शक्तिशाली परकम्पको त्रासका कारण थप हजारौँ स्थानीयवासीले खुला आकाशमुनि रात बिताएका छन्। विद्यालय, स्वास्थ्य केन्द्र र चर्चसहित कम्तीमा एक सय ६७ सार्वजनिक संरचनामा समेत क्षति पुगेको छ।

राहत र उद्धारमा चुनौती

राहतकर्मीले प्रभावित क्षेत्रमा चामल, तयारी खाना, खानेपानी, कम्बल र औषधि वितरण सुरु गरेका छन्। विस्थापितका लागि अस्थायी आश्रयस्थल निर्माण भइरहेको छ।

विद्युत् तथा सञ्चार सेवा पुनःस्थापना गर्नु र पहिरोका कारण सम्पर्कविच्छेद भएका दुर्गम गाउँमा राहत सामग्री पुर्‍याउनु उद्धार टोलीका लागि मुख्य चुनौती बनेको छ। भूकम्पबाट कोमोडो राष्ट्रिय निकुञ्जको प्रवेशद्वार मानिने लाबुआन बाजो क्षेत्रसमेत प्रभावित भएको छ।

पहिरोका कारण फ्लोरेसका विभिन्न बस्ती जोड्ने करिब सात सय किलोमिटर लामो ट्रान्स–फ्लोरेस राजमार्गका केही खण्ड अवरुद्ध भएका छन्। क्षतिग्रस्त घरमा फर्किन जोखिम भएपछि धेरै स्थानीयवासीले बाहिरै रात बिताएका छन्।

लाबुआन बाजोकी किसान अनास्तासिया इमादले भूकम्पको कम्पन निकै तीव्र र डरलाग्दो रहेको बताइन्। परकम्पका कारण घर भत्किएर आफूहरूमाथि खस्ने डरले अस्थायी आश्रयस्थलमा बस्नुपरेको उनले बताइन्।

दुर्गम क्षेत्रमा खोजी जारी

पहुँच कठिन रहेका मङ्गराई, पूर्वी मङ्गराई र नागेकेओलगायत क्षेत्रमा उद्धार टोलीले खोजी कार्य जारी राखेका छन्। मौमेरेस्थित खोज तथा उद्धार कार्यालयका प्रमुख फतुर रहमानका अनुसार अधिकांश पहिरो हटाएर केही पृथक गाउँमा सडक सम्पर्क पुनःस्थापित गरिएको छ।

तर सञ्चार र विद्युत् सेवा अवरुद्ध हुँदा खोजी तथा उद्धारमा समस्या भइरहेको छ। उद्धारकर्ताले भत्किएका घर तथा अन्य संरचनाको भग्नावशेषमा सम्भावित पीडितको खोजी गरिरहेका छन्।

भूकम्पको उच्च जोखिममा इन्डोनेसिया

१७ हजारभन्दा बढी टापु रहेको इन्डोनेसिया प्रशान्त महासागरको ‘रिङ अफ फायर’ क्षेत्रमा पर्छ। सक्रिय ज्वालामुखी र फल्ट लाइनका कारण इन्डोनेसिया भूकम्प तथा ज्वालामुखी गतिविधिको उच्च जोखिममा रहेको मुलुक हो।

सन् १९९२ मा फ्लोरेस क्षेत्रमा गएको शक्तिशाली भूकम्पपछि आएको सुनामीमा करिब दुई हजार पाँच सय जनाको मृत्यु भएको थियो। सन् २०१८ मा ७.५ म्याग्निच्युडको भूकम्पपछि आएको सुनामी र भू–तरलीकरणका कारण पालु सहरमा ठूलो विनाश भएको थियो, जसमा चार हजार चार सयभन्दा बढी मानिसको मृत्यु भएको थियो।

त्यसैगरी, सन् २००४ को डिसेम्बरमा सुमात्रा टापु नजिकै गएको ९.१ म्याग्निच्युडको भूकम्पपछि आएको विनाशकारी सुनामीले हिन्द महासागर क्षेत्रका एक दर्जनभन्दा बढी देशमा करिब दुई लाख ३० हजार मानिसको ज्यान लिएको थियो।

Originally published on abcnews.com.np.