रुकुमपश्चिम । रुकुम पश्चिमको मुसीकोट नगरपालिका–१ सल्लेस्थित जिल्ला अस्पतालमा बिरामीको चाप बढे पनि आवश्यक चिकित्सक नहुँदा उपचार सेवा प्रभावित भएको छ ।

वर्षायाम सुरु भएसँगै रुघाखोकी, ज्वरो, पखालालगायत मौसमी रोगका बिरामी बढिरहेका छन् । तर, चिकित्सक अभावका कारण समयमै स्वास्थ्य सेवा पाउन समस्या भएको बिरामीको गुनासो छ ।

विशेषज्ञसहित आठ चिकित्सकको दरबन्दी रहेको अस्पतालमा अहिले तीन जना मात्रै कार्यरत छन् । चार विशेषज्ञ र चार मेडिकल अधिकृतको दरबन्दी रहेको अस्पतालमा हाल एक स्त्रीरोग विशेषज्ञ र एक मेडिकल अधिकृत कार्यरत छन् । अस्पतालले आन्तरिक स्रोतबाट एक हाडजोर्नी तथा नसा रोग विशेषज्ञसमेत व्यवस्थापन गरेको छ ।

एक चिकित्सकको भरमा अस्पताल

स्वास्थ्य सेवा कार्यालयका सूचना अधिकारी जनस्वास्थ्य अधिकृत कालीबहादुर ओलीका अनुसार अस्पतालमा दैनिक १५० भन्दा बढी बिरामी उपचारका लागि आउने गरेका छन् ।

अस्पतालका व्यवस्थापक तथा स्त्रीरोग विशेषज्ञ डा. जीवन परियार उपचारका लागि जिल्लाबाहिर रहेका कारण अहिले एक जना मेडिकल अधिकृतको भरमा अस्पताल सञ्चालन भइरहेको छ ।

यसअघि संघ र प्रदेशबाट छात्रवृत्ति करारमा चिकित्सक आउने गरे पनि पछिल्लो दुई महिनायता उनीहरूको सेवा अवधि सकिएपछि अस्पतालमा चिकित्सक अभाव भएको हो ।

निजी अस्पताल जान बाध्य

सरकारी अस्पतालमा चिकित्सकको अभाव भएपछि कतिपय बिरामी उपचार नै नगराई फर्किनुपर्ने अवस्था आएको छ । रुकुमपूर्वको सिस्ने गाउँपालिका–३ बाट उपचारका लागि आएका लक्ष्मण लामिछानेले बिरामीको चाप उच्च भए पनि एक जना मेडिकल अधिकृतले मात्रै सबै बिरामी हेर्नुपर्ने अवस्था रहेको बताए ।

त्रिवेणी गाउँपालिकाबाट उपचारका लागि आएकी नवीना पुनले पनि पालोका लागि घण्टौँ कुर्नुपर्ने र चिकित्सक भेट्न कठिन भएपछि निजी क्लिनिकमा उपचार गराउनुपरेको बताइन् ।

चिकित्सक थप्ने तयारी

अस्पताल प्रशासनले चिकित्सक अभाव समाधानका लागि प्रदेश सरकारसँग दरबन्दीअनुसार जनशक्ति माग गरेको जनाएको छ । साथै आन्तरिक आम्दानीबाट खर्च व्यहोर्ने गरी थप तीन जना चिकित्सकलाई करारमा नियुक्त गर्ने प्रक्रिया अघि बढाइएको छ ।

अस्पतालमा रुकुम पश्चिमसँगै रुकुम पूर्व, सल्यान, जाजरकोट, डोल्पा र रोल्पाबाट समेत बिरामी उपचारका लागि आउने गरेका छन् ।

१५ शय्याका लागि स्वीकृत दरबन्दी रहेको जिल्ला अस्पतालले हाल करिब ४० शय्याबाट सेवा दिइरहेको स्वास्थ्य सेवा कार्यालयले जनाएको छ ।

Originally published on abcnews.com.np.