काठमाडौं । नेपाली कांग्रेसको संस्थापन इतर पक्षले १५औँ महाधिवेशनको तयारीको संयोजन पूर्वमहामन्त्री डा. शशांक कोइरालालाई दिने निर्णय गरेको छ । पूर्वसभापति शेरबहादुर देउवाको निर्देशनमा कोइरालाले महाधिवेशनसम्मका गतिविधि समन्वय गर्ने भएका हुन् ।

साउन २९ देखि ३१ गतेसम्म भएको राष्ट्रिय भेला तथा सम्मेलनले देउवाको निर्देशनअनुसार कोइरालालाई महाधिवेशन तयारीको जिम्मेवारी दिने निर्णय गरेको हो ।

निर्णयमा भनिएको छ, ‘१५औँ महाधिवेशनसम्म नियमित क्रियाकलाप सभापतिको निर्देशनमा राष्ट्रिय भेला तथा सम्मेलन आयोजक समितिका संयोजकले नै संयोजन गर्दै जानुहुनेछ ।’

यसअघि पनि कांग्रेसको इतर पक्षले राष्ट्रिय भेला तथा सम्मेलन आयोजनाका लागि कोइरालालाई संयोजकको जिम्मेवारी दिएको थियो । उनकै संयोजकत्वमा साउन २९ देखि ३१ गतेसम्म राष्ट्रिय भेला तथा सम्मेलन सम्पन्न भएको थियो ।

महाधिवेशन तयारी अघि बढाउने

राष्ट्रिय भेला सम्पन्न भएपछि सोही जिम्मेवारीलाई निरन्तरता दिँदै कोइरालाले १५औँ महाधिवेशनको तयारी अघि बढाउने भएका छन् ।

देउवाको मार्गदर्शनमा कोइरालाले महाधिवेशन तयारीका लागि आवश्यक कार्ययोजना बनाउने तथा अन्य नेता–कार्यकर्तासँग समन्वय गर्ने बताइएको छ ।

कांग्रेसको महाधिवेशनसम्म इतर पक्षका नियमित राजनीतिक गतिविधि र संगठनात्मक तयारीलाई समेत कोइरालाले संयोजन गर्नेछन् ।

Originally published on abcnews.com.np.