काठमाडौं । नेपाली कांग्रेसको संस्थापनइतर पक्षले आयोजना गरेको राष्ट्रिय भेलाको समापन सत्रमा डा. शेखर कोइराला सहभागी भएनन् । आइतबार सम्पन्न समापन कार्यक्रममा उनी अनुपस्थित रहे पनि भेलाको उद्घाटन सत्रमा भने सक्रिय रूपमा सहभागी भएका थिए ।

उद्घाटनमा सहभागी भएका कोइराला समापन सत्रमा नदेखिनुलाई कांग्रेसभित्र अर्थपूर्ण रूपमा हेरिएको छ । पछिल्लो समय संस्थापनइतर पक्षका गतिविधि आन्तरिक दबाब र शक्ति संघर्षसँगै पार्टी विभाजनको सम्भावनासम्म जोडेर चर्चा भइरहेका बेला उनको अनुपस्थितिले थप राजनीतिक चासो बढाएको हो ।

यद्यपि, कोइरालाको सचिवालयले भने उनको अनुपस्थितिलाई राजनीतिक असहमतिको रूपमा बुझ्न नहुने जनाएको छ ।

कोइरालाका सचिवालय सदस्य दिनेशचन्द्र थपलियाका अनुसार व्यक्तिगत काम परेकाले उनी समापन सत्रमा सहभागी हुन नसकेका हुन् । उनका अनुसार कोइराला भेलाको उद्घाटन सत्रमा सहभागी भएका थिए र समापनमा अनुपस्थित हुनुको अन्य कुनै राजनीतिक कारण छैन ।

भेलाले आगामी महाधिवेशनको तयारीलगायत विषयमा विभिन्न निर्णय गरेको छ । संस्थापनइतर पक्षको राष्ट्रिय भेलामा पार्टीको आगामी महाधिवेशन, नेतृत्व र सांगठनिक विषयमा समेत छलफल भएको थियो ।