काठमाडौँ । कान्स फिल्म फेस्टिभलमा अवार्ड जितेको नेपाली चलचित्र ‘तिनीहरू : इलिफेन्ट इन द फग’को टोलीले काठमाडौंको भृकुटीमण्डपमा आयोजित नाइमा मोबिलिटी शोमा विशेष प्रस्तुति दिएको छ।

चलचित्रको टोलीले कार्यक्रमको सुरुवात ‘शादी के दिन में (ला ला ला ला)’ गीतमा नृत्य प्रस्तुत गर्दै गरेको थियो। त्यसपछि एनआईयूको स्टलमा पुगेर चलचित्रमा समावेश ‘बलम’ गीतमा नृत्य प्रस्तुत गरेको थियो। कलाकारको प्रस्तुतिमा दर्शक उत्साहित भएर सहभागी भएका थिए।

टोलीले महेन्द्राको स्टलमा समेत प्रस्तुति दिँदै दर्शकलाई मनोरञ्जन प्रदान गरेको थियो। उपस्थित दर्शकले चलचित्र प्रदर्शनको प्रतीक्षा गरिरहेको बताएका थिए।

‘तिनीहरू : इलिफेन्ट इन द फग’ कान्स फिल्म फेस्टिभलको यूएन सर्टेन रिगार्ड सेक्सनमा छनोट हुने पहिलो नेपाली फिचर फिल्म हो। चलचित्रले उक्त विधामा जुरी अवार्डसमेत जितेको थियो।

चलचित्रको टोली यसअघि के–पप काठमाडौं डान्स फेस्टिभलमा प्रमुख अतिथिका रूपमा सहभागी भएको थियो। टोलीले प्रतियोगिताका विजेता तथा सहभागीलाई पुरस्कार प्रदान गर्दै उनीहरूको प्रतिभाको सम्मान गरेको थियो। चलचित्र सो कार्यक्रमको मुभी पार्टनरसमेत रहेको थियो।

यसैगरी, इन्फा अवार्डले चलचित्रको टोलीलाई नेपाललाई अन्तर्राष्ट्रिय मञ्चमा चिनाउन योगदान पुर्‍याएको भन्दै विशेष सम्मान गरेको छ।

कार्यक्रममा काठमाडौं महानगरपालिकाकी कार्यवाहक मेयर सुनीता डंगोलले कान्समा चलचित्रको वर्ल्ड प्रिमियरमा आफू सहभागी भएको स्मरण गर्दै नेपाली फिल्मका लागि यो उपलब्धि गौरवको विषय भएको बताइन्। उनले चलचित्रले कान्समा पाएको आठ मिनेट लामो स्ट्यान्डिङ ओभेसनको समेत चर्चा गर्दै दर्शकलाई चलचित्र हेर्न आग्रह गरिन्।

‘तिनीहरू : इलिफेन्ट इन द फग’ भदौ १९ गतेदेखि नेपालमा प्रदर्शन हुँदैछ।

Originally published on abcnews.com.np.