काठमाडौँ । नेकपा (एमाले) का महासचिव शंकर पोखरेलले एमालेसहितका वामपन्थी शक्ति आधारभूत वर्ग र समुदायबाट टाढिँदै गएको बताएका छन्।

आइतबार काठमाडौंमा आयोजित ‘वामपन्थी आन्दोलन अब के गर्ने?’ विषयक राष्ट्रिय बहसमा बोल्दै पोखरेलले पछिल्लो प्रतिनिधिसभा निर्वाचनमा एमालेले पार्टी सदस्य तथा उनीहरू निकट समुदायबाहेक व्यापक वर्ग र समुदायको जनमत आकर्षित गर्न नसकेको स्वीकार गरे।

उनले वामपन्थी शक्तिहरू पूर्वाधार विकासमा बढी केन्द्रित हुँदा सामाजिक विकास, सामाजिक न्याय, शिक्षा, स्वास्थ्य र रोजगारीका विषयमा अपेक्षाकृत प्रभावकारी काम गर्न नसकेको बताए।

‘आधारभूत वर्ग र समुदायबाट हामी किन टुट्यौँ?’ भन्ने प्रश्नको जवाफ दिँदै पोखरेलले भने, “हामी पूर्वाधार विकासमा बढी केन्द्रित भयौँ। सामाजिक विकास र सामाजिक न्यायका मुद्दामा, खासगरी शिक्षा, स्वास्थ्य र रोजगारीको प्रत्याभूतिको सम्बन्धमा हामी प्रभावकारी हुन सकेनौँ।”

शिक्षित बेरोजगारी प्रमुख चुनौती

पोखरेलले नेपालको ठूलो श्रमशक्ति अझै कृषिमा निर्भर रहे पनि कृषिमा संलग्न परिवारका शिक्षित युवाहरू कृषि पेसामा फर्कन नचाहने अवस्था रहेको बताए।

कृषिमा शिक्षित युवाको पर्याप्त संलग्नता हुन नसक्दा शैक्षिक बेरोजगारी बढेको र त्यसबाट उत्पन्न असन्तुष्टि वैदेशिक पलायन तथा राज्यप्रतिको आक्रोशमा परिणत भएको उनको भनाइ छ।

उनले मुलुकको वर्तमान संकटको एउटा प्रमुख कारण शिक्षित पुस्तामा बढ्दो बेरोजगारी र त्यसबाट उत्पन्न असन्तुष्टि रहेको बताए।

पार्टी पुनर्गठनमा जोड

महासचिव पोखरेलले एमालेको समग्र पुनर्गठन आजको आवश्यकता भएको पनि बताए। वामपन्थी कार्यकर्तामा देखिएको निराशालाई उत्साह र गतिशीलतामा रूपान्तरण गर्नुपर्ने उनको भनाइ छ।

उनले आगामी दिनमा वामपन्थी दलहरूले जनतासँगको सम्बन्ध थप बलियो र सुदृढ बनाउनुपर्नेमा जोड दिँदै आधारभूत वर्ग तथा समुदायका समस्या र अपेक्षासँग पार्टीको सम्बन्ध पुनः स्थापित गर्नुपर्ने बताए।

Originally published on abcnews.com.np.