हङकङ । हङकङ अब्जर्भेटरीले आगामी साताको मध्यतिर न्यून चापीय प्रणालीका कारण हङकङमा हावाहुरी, वर्षा र आँधीबेहरीको सम्भावना रहेको जनाएको छ।

अब्जर्भेटरीका अनुसार साताको सुरुआतमा दुई दिन चर्को घामसँगै अत्यधिक गर्मी हुने भए पनि मध्य सातातिर मौसममा अस्थिरता आउन सक्नेछ।

यसअघि करिब दुई साताअघि आएको ‘नोल’ आँधीका कारण झन्डै दुई दर्जन मानिस घाइते भएका थिए भने ३५० भन्दा बढी रुख ढलेका थिए। रुख ढल्दा सडक अवरुद्ध हुनुका साथै कतिपय स्थानमा बाढीसमेत आएको थियो।

आँधीका बेला हङकङ गृह विभागले दुई दर्जनभन्दा बढी अस्थायी आश्रयस्थल सञ्चालनमा ल्याएको थियो। आँधीको प्रभावका कारण अन्तिम दिन मात्रै ३५० उडान रद्द भएका थिए भने १९० भन्दा बढी सीमापार उच्चगतिको रेल सेवा प्रभावित भएका थिए।

नयाँ आँधीको सम्भावनालाई ध्यानमा राख्दै अब्जर्भेटरीले जारी गर्ने मौसमसम्बन्धी चेतावनीअनुसार आवश्यक सतर्कता अपनाउन आग्रह गरिएको छ।

Originally published on abcnews.com.np.