काठमाडौँ । नेपाल उद्योग वाणिज्य महासङ्घका निवर्तमान अध्यक्ष तथा आइएमई ग्रुपका अध्यक्ष चन्द्रप्रसाद ढकालले कोरियाबाट फर्किएका नेपालीको सीप, अनुभव र पुँजीलाई नेपालको आर्थिक रूपान्तरणको महत्वपूर्ण आधार बनाउनुपर्ने बताएका छन्।

नेपाल–कोरिया उद्यमी व्यवसायी संघले आयोजना गरेको अन्तरक्रिया कार्यक्रममा बोल्दै ढकालले नेपाल र दक्षिण कोरियाबीचको सम्बन्ध कूटनीतिक तथा सांस्कृतिक सम्बन्धमा मात्र सीमित नभई आर्थिक र व्यावसायिक साझेदारीमा समेत विस्तार भइरहेको बताए।

कोरियामा रोजगारी गरेर फर्किएका हजारौँ नेपाली युवाले हासिल गरेको सीप, कार्यअनुभव र पुँजी नेपालको उद्यमशीलता विकासका लागि महत्वपूर्ण सम्पत्ति भएको उनको भनाइ थियो। कोरियाले केही दशकमा गरिबीबाट औद्योगिक शक्तिका रूपमा गरेको रूपान्तरणबाट नेपालले पनि धेरै कुरा सिक्न सक्ने उनले बताए।

ढकालले कोरियाको अनुशासित कार्यसंस्कृति, गुणस्तरमा जोड, प्रविधिको प्रयोग, निर्यातमुखी उत्पादन तथा सरकार र निजी क्षेत्रबीचको सहकार्यलाई नेपालमा पनि लागू गर्नुपर्नेमा जोड दिए। रिटर्नी उद्यमीले विदेशमा सिकेको सीप र उत्पादकत्वमा आधारित कार्यसंस्कृति स्वदेशी उद्योगमा प्रयोग गर्न सके नेपालको औद्योगिक चरित्र परिवर्तन गर्न सकिने उनले बताए।

उनले जलविद्युत्, कृषि प्रशोधन, पर्यटन, सूचना प्रविधि तथा साना–मझौला उत्पादनमूलक क्षेत्रमा लगानीको ठूलो सम्भावना रहेको उल्लेख गरे। भारत र चीनसँगको भौगोलिक निकटता तथा सुधार हुँदै गएको लगानी वातावरणले नेपाललाई क्षेत्रीय उत्पादन केन्द्रका रूपमा विकास गर्ने अवसर दिएको उनको भनाइ थियो।

लगानीमैत्री नीति र एकद्वार सेवाका लागि सरकारसँग निजी क्षेत्रले निरन्तर संवाद गरिरहेको बताउँदै ढकालले यस्तो पहललाई अझ तीव्र बनाउनुपर्ने बताए। देशभर छरिएको सानो पुँजीलाई एकीकृत गरी ठूला आयोजनामा लगानी गर्ने उद्देश्यले १० अर्ब रुपैयाँ पुँजीको नेपाल डेभलपमेन्ट कम्पनी लिमिटेड स्थापना गरिएको जानकारी पनि उनले दिए।

नयाँ व्यवसाय सुरु गर्न चाहने रिटर्नी उद्यमीलाई कम्पनीले लगानी साझेदार बन्न सक्ने र सानो पुँजी भएका व्यक्तिले नेपाल डेभलपमेन्ट पब्लिक लिमिटेडमार्फत लगानी गर्न सक्ने ढकालले बताए।

रिटर्नी उद्यमी–व्यवसायीसँग रहेको प्राविधिक सीप, कार्यसंस्कृति र आर्थिक अनुशासन नेपालको उद्योग क्षेत्रका लागि महत्वपूर्ण रहेको उल्लेख गर्दै उनले स्वदेशमा उद्यम स्थापना गर्दा देखिने कानुनी तथा प्रक्रियागत अवरोध हटाउन सरकार, निजी क्षेत्र र सरोकारवालाबीच निरन्तर संवाद आवश्यक रहेको बताए।

रिटर्नी उद्यमीको सीप र लगानीले स्वदेशमै उत्पादन, रोजगारी र समृद्धिको नयाँ आधार निर्माण गर्ने विश्वास व्यक्त गर्दै ढकालले एफएनसीसीआई र आइएमई ग्रुपका तर्फबाट आवश्यक सहयोग निरन्तर रहने प्रतिबद्धता जनाए।

कार्यक्रममा नेपालका लागि कोरियाका राजदूत, कोरियाली दूतावासका प्रतिनिधि, नेपाल सरकारका अधिकारी, रिटर्नी माइग्रेन्ट तथा विभिन्न क्षेत्रका उद्यमी–व्यवसायीको सहभागिता थियो।

Originally published on abcnews.com.np.