कैलाली । कैलालीमा ट्रकको ठक्करबाट नेकपा (एमाले) नेत्री सावित्रा सापकोटाको मृत्यु भएको छ।

सोमबार बिहान बर्दगोरिया गाउँपालिका–१ स्थित मुडा पुल नजिकै ट्रकले स्कुटरलाई ठक्कर दिँदा एमाले सुदूरपश्चिम प्रदेश कमिटी सल्लाहकार परिषद् सदस्य सापकोटाको मृत्यु भएको वडा अध्यक्ष मिठुन गौतमले जानकारी दिनुभयो।

वडाध्यक्ष गौतमका अनुसार मुडास्थित घरमा पूजाआजा गरेर बौनियातर्फ जाँदै गर्दा आफ्नै लेनमा स्कुटर चलाइरहेकी सापकोटालाई ट्रकले ठक्कर दिएको थियो।

प्रहरीका अनुसार से १–०१–००१ ख नम्बरको स्कुटरलाई लु १–०१–०१० प ००४५ नम्बरको ट्रकले ठक्कर दिएको हो। ट्रक नवलपरासी (बर्दघाट) का २६ वर्षीय दिनेश गिरीले चलाइरहेका थिए।

दुर्घटनामा गम्भीर घाइते सापकोटालाई उपचारका लागि दोदोधरा अस्पताल लगिएको थियो। तर, चिकित्सकले उनलाई मृत घोषणा गरेका थिए।

घटनापछि प्रहरीले ट्रक र चालकलाई नियन्त्रणमा लिएको छ। इलाका प्रहरी कार्यालय सुखडले घटनाबारे थप अनुसन्धान भइरहेको जनाएको छ।

सापकोटा २०७४ सालको स्थानीय तह निर्वाचनमा बर्दगोरिया गाउँपालिकाको उपाध्यक्ष पदका लागि एमालेबाट उम्मेदवार समेत बन्नुभएको थियो।

Originally published on abcnews.com.np.