काठमाडौँ । नेपाली कांग्रेसको संस्थापन पक्षले इतर समूहले राजधानीमा आयोजना गरेको राष्ट्रिय सम्मेलनबाट पारित प्रतिवेदनप्रति आपत्ति जनाएको छ।

आइतबार पार्टी कार्यालय सानेपामा बसेको केन्द्रीय कार्यसम्पादन समिति बैठकपछि सञ्चारकर्मीसँग कुरा गर्दै पार्टी प्रवक्ता देवराज चालिसेले इतर समूहको भेलाबाट पारित निर्णयप्रति असन्तुष्टि जनाएका हुन्। उनले इतर समूहका निर्णयलाई केन्द्रीय समितिले गम्भीर रूपमा नियालिरहेको बताए।

इतर समूहले १४औँ महाधिवेशनबाट निर्वाचित कार्यसमितिले १५औँ महाधिवेशन सभापति शेरबहादुर देउवाको नेतृत्वमा गर्नुपर्ने प्रस्ताव गरेको भन्दै प्रवक्ता चालिसेले यस्तो व्यवस्था कांग्रेसको विधानअनुकूल नभएको दाबी गरे।

चालिसेले पार्टीभित्र अहिले विवाद नभई असन्तुष्टि मात्र रहेको दाबी गर्दै असहमति र विवादको समाधान पार्टीकै आधिकारिक फोरमबाट खोजिनुपर्ने बताए। उनले पार्टीका आन्तरिक विषयमा सार्वजनिक रूपमा समानान्तर निर्णय गर्नेभन्दा विधान र संस्थागत प्रक्रियामार्फत अघि बढ्नुपर्नेमा जोड दिए।

पार्टी नेतृत्व अदालतले चयन गर्ने विषय नभएको उल्लेख गर्दै चालिसेले नेतृत्वलाई पार्टीले नै वैधानिकता दिनुपर्ने बताए। विशेष महाधिवेशनबाट निर्वाचित गगन थापाको नेतृत्व पार्टीको विधानअनुसार चयन भएको र त्यसलाई अदालत तथा निर्वाचन आयोगले समेत मान्यता दिएको उनको दाबी थियो।

संस्थापन पक्षले विशेष महाधिवेशनका क्रममा असहमति राखेका विषयलाई आगामी १५औँ महाधिवेशनमा एजेण्डाका रूपमा प्रस्तुत गर्न इतर समूहलाई आग्रह गरेको छ। चालिसेले लोकप्रिय एजेण्डासहित महाधिवेशनमा प्रतिस्पर्धा गरेर पार्टीभित्रैबाट समाधान खोज्न आग्रह गरे।

कांग्रेसभित्र संस्थापन र इतर समूहबीच महाधिवेशनको प्रक्रिया, नेतृत्व तथा वैधानिकताका विषयमा मतभेद रहँदै आएको छ। पछिल्लो राष्ट्रिय सम्मेलनबाट इतर समूहले पारित गरेको प्रतिवेदनपछि उक्त मतभेद थप सार्वजनिक बहसमा आएको छ।

Originally published on abcnews.com.np.