कैलाली । नेपाली कम्युनिस्ट पार्टी (नेकपा) नेतृत्वको सुदूरपश्चिम प्रदेश सरकारमा पार्टीबाट मन्त्री नियुक्तिको टुंगो लाग्न सकेको छैन। मुख्यमन्त्री खगराज भट्ट नियुक्त भएको तीन दिन बितिसक्दा पनि नेकपाले पाउने तीन मन्त्री र दुई राज्यमन्त्रीको नाम तय हुन नसकेको हो।

शुक्रबार भट्ट मुख्यमन्त्री नियुक्त भएकै दिन नेकपा एमालेबाट तीन मन्त्री र एक राज्यमन्त्री नियुक्त भएका थिए। सत्ता गठबन्धनको भागबन्डाअनुसार अब नेकपाले तीन मन्त्री र दुई राज्यमन्त्री नियुक्त गर्नुपर्नेछ।

तर, मन्त्रीको नाम टुंगो नलाग्दै डोटीबाट निर्वाचित प्रदेशसभा सदस्य शिवसिंह ओलीलाई भने भौतिक पूर्वाधार मन्त्री बनेको भन्दै सामाजिक सञ्जालमा बधाईको ओइरो लागेको छ।

आइतबार दिउँसोदेखि ओलीको तस्बिरसहित बधाई तथा शुभकामना दिने क्रम सुरु भएको थियो। प्रदेशसभा सदस्यदेखि गाउँपालिकाका पूर्वअध्यक्ष र पार्टीका कार्यकर्तासम्मले उनलाई मन्त्री बनेको भन्दै बधाई दिएका छन्।

ओली आफैँले भने आफू मन्त्री नियुक्त नभएको स्पष्ट पार्दै सामाजिक सञ्जालमार्फत खण्डन गर्नुपरेको छ। उनले सुदूरपश्चिम प्रदेश सरकारमा नेकपाबाट प्रतिनिधित्व गर्ने मन्त्रीहरूको नाम र जिम्मेवारीबारे पार्टीमा छलफल चलिरहेको र अहिलेसम्म टुंगो नलागेको बताएका छन्।

‘सुदूरपश्चिम प्रदेश सरकार मन्त्रिपरिषद्मा नेकपाबाट प्रतिनिधित्व गर्ने सदस्यहरूको जिम्मेवारी र नाम अझै पार्टीमा छलफल चलिरहेको र टुंगो नलागेको जानकारी गराउँदछु,’ ओलीले लेखेका छन्।

मन्त्रीको टुंगो नलाग्दै बधाईको ओइरो आएपछि ओलीले आइतबार साँझ आफूलाई फोन र सामाजिक सञ्जालमार्फत धेरैले बधाई दिइरहेको भन्दै हैरानीसमेत व्यक्त गरेका थिए।

मन्त्री नबन्दै सांसदलाई बधाई

कांग्रेस सांसद ललिता सुनारले समेत सोमबार बिहान ओलीको तस्बिर राखेर उनलाई भौतिक पूर्वाधार मन्त्री बनेको भन्दै बधाई दिएकी छन्। यस्तै, धेरै शुभचिन्तक र आफन्तले फोन तथा सामाजिक सञ्जालबाट उनलाई शुभकामना दिएका छन्।

ओलीनिकट एक नेताका अनुसार पार्टीभित्र ओलीलाई मन्त्री बनाउनुपर्ने धारणा रहे पनि औपचारिक रूपमा मन्त्रीको मापदण्ड र नाम तय भइसकेको छैन।

आकांक्षी धेरै, भागबन्डा मिलाउन सकस

सत्ता गठबन्धनको सहमतिअनुसार साविक माओवादी, नेकपा एकीकृत समाजवादी र नागरिक उन्मुक्ति पार्टीबाट एक–एक जना मन्त्री बनाउने तयारी छ। तर, मन्त्रीका आकांक्षी धेरै भएपछि नाम टुंग्याउन नेतृत्वलाई सकस भइरहेको छ।

सुदूरपश्चिममा पछिल्लो चार वर्षमा प्रदेशसभाका अधिकांश सांसद मन्त्री बनिसकेका छन्। साविक नागरिक उन्मुक्ति पार्टीका सबै तथा साविक नेकपा एकीकृत समाजवादीका प्रकाश रावल बाहेक अधिकांश सांसद मन्त्री भइसकेका छन्।

साविक माओवादीबाट भने शिवसिंह ओली, दार्चुलाका मानबहादुर धामी र कैलालीकी जानकी पौडेल कुँवर मन्त्री बन्न बाँकी छन्। धामी र रावल यसअघि प्रदेश सरकारमा मन्त्री भइसकेका थिए।

नेकपाभित्र यसपटक अहिलेसम्म मन्त्री नबनेका सांसदलाई प्राथमिकता दिनुपर्ने माग रहे पनि त्यसका लागि औपचारिक मापदण्ड भने तय भइसकेको छैन। यही कारण मन्त्री चयन प्रक्रिया लम्बिने देखिएको छ।

Originally published on abcnews.com.np.