काठमाडौं । राष्ट्रिय प्रजातन्त्र पार्टी (राप्रपा)ले बागमती र लुम्बिनी प्रदेशका मुख्यमन्त्रीले मागेको विश्वासको मतको प्रस्तावमा तटस्थ बस्ने निर्णय गरेको छ।

राप्रपाका प्रवक्ता मोहन श्रेष्ठले दुवै प्रदेशमा मुख्यमन्त्रीलाई विश्वासको मत नदिई तटस्थ बस्ने निर्णय भएको जानकारी दिएका छन्। उनका अनुसार पार्टी अध्यक्ष राजेन्द्र लिङ्देनले दुवै प्रदेशका संसदीय दलका नेताहरूलाई तटस्थ बस्न निर्देशन दिएका छन्।

श्रेष्ठले सामाजिक सञ्जालमार्फत भनेका छन्, ‘राप्रपाले प्रदेश सरकारमा आज विश्वासको मत लिँदै गरेका बागमती र लुम्बिनी प्रदेशमा तटस्थ बस्ने निर्णय गरेको छ।’

सोमबार बागमतीका मुख्यमन्त्री इन्द्रबहादुर बानियाँ र लुम्बिनीका मुख्यमन्त्री चेतनारायण आचार्यले विश्वासको मत लिँदै छन्। बागमतीमा नेपाली कांग्रेस नेतृत्वको सरकार छ भने लुम्बिनीमा नेकपा (एमाले) नेतृत्वको सरकार छ।

दुवै प्रदेशमा एमाले र नेपाली कम्युनिस्ट पार्टी (नेकपा)बीच सरकार गठनका लागि सहमति भए पनि मुख्यमन्त्रीहरूलाई स्पष्ट बहुमत पुग्ने अवस्था छैन। त्यसैले सरकार जोगाउन साना दलको समर्थन आवश्यक देखिएको छ।

राप्रपाका बागमती प्रदेशमा १२ र लुम्बिनी प्रदेशमा चार सांसद छन्। राप्रपा तटस्थ बसेसँगै दुवै प्रदेशमा मुख्यमन्त्रीका लागि विश्वासको मत जुटाउने समीकरण थप चुनौतीपूर्ण बनेको छ।

Originally published on abcnews.com.np.