विराटनगर । जिल्ला कारागार मोरङमा बिहीबार बिहानैदेखि खानतलासी सुरु भएपछि कैदीबन्दीले विरोध प्रदर्शन गरेका छन् ।

कारागारको बी ब्लकमा बिहान करिब ४ः३० बजेदेखि सुरक्षाकर्मीले खानतलासी सुरु गरेका हुन् । कारागारभित्र लागुऔषधलगायत अवैध वस्तु राखिएको विशेष सूचनाका आधारमा ठूलो संख्यामा सुरक्षाकर्मी परिचालन गरिएको बताइएको छ ।

खानतलासीका लागि मोरङका प्रमुख जिल्ला अधिकारी युवराज कट्टेल, जिल्ला प्रहरी प्रमुख एसपी कवित कटवाललगायत जिल्ला सुरक्षा समितिका पदाधिकारी बिहानै कारागार पुगेका थिए ।

नियमित खानतलासी भएको प्रहरीको दाबी

मोरङ प्रहरी प्रमुख एसपी कटवालले कारागारमा गरिएको खानतलासी नियमित प्रक्रियाअन्तर्गत भएको बताएका छन् ।

उनका अनुसार कारागारमा बेला–बेला सुरक्षा जाँच तथा खानतलासी हुँदै आएको र अहिले पनि त्यसैलाई निरन्तरता दिइएको हो ।

स्थानान्तरणको तयारीप्रति कैदीबन्दीको विरोध

खानतलासीसँगै बी ब्लकका कैदीबन्दीले भने विरोध जनाएका छन् । खानतलासीपछि आफूहरूलाई अन्यत्र स्थानान्तरण गर्ने तयारी भइरहेको बुझेपछि उनीहरू प्रदर्शन र नाराबाजीमा उत्रिएको बताइएको छ ।

विरोधमा कैदीबन्दीले कारागार परिसरभित्रै आगोसमेत बालेर प्रदर्शन गरेका छन् । सुरक्षा निकायले स्थिति नियन्त्रणमा राख्दै खानतलासीको काम अघि बढाइरहेको जनाएको छ ।

Originally published on abcnews.com.np.