काठमाडौँ । जिल्ला अदालत काठमाडौंले पत्रकार तथा जनआस्था साप्ताहिकका सम्पादक किशोर श्रेष्ठलाई थप चार दिन हिरासतमा राखेर अनुसन्धान गर्न अनुमति दिएको छ ।

श्रेष्ठलाई प्रहरीले सोमबार जिल्ला अदालतमा उपस्थित गराउँदै थप अनुसन्धानका लागि म्याद मागेको थियो । यसअघि अदालतले उनलाई तीन दिन हिरासतमा राख्न अनुमति दिएको थियो । अनुसन्धान पूरा नभएको भन्दै प्रहरीले पुनः म्याद मागेपछि अदालतले थप चार दिनको अनुमति दिएको हो ।

श्रेष्ठलाई प्रहरीले साउन २७ गते पक्राउ गरेको थियो । उनीविरुद्ध वैयक्तिक गोपनीयता हननसम्बन्धी कसुरमा अनुसन्धान भइरहेको प्रहरीले जनाएको छ । हाल उनी महाराजगञ्ज प्रहरीको हिरासतमा छन् ।

सर्वोच्चमा बन्दीप्रत्यक्षीकरण रिट

श्रेष्ठकी पत्नी सरस्वती श्रेष्ठले उनको थुनामुक्तिको माग गर्दै साउन २९ गते सर्वोच्च अदालतमा बन्दीप्रत्यक्षीकरण रिट दायर गरेकी थिइन् ।

उक्त रिटमा सर्वोच्च अदालतले श्रेष्ठलाई उनीसँग बरामद सामग्रीसहित सोमबार उपस्थित गराउन आदेश दिएको थियो । रिटमाथि न्यायाधीशद्वय डा. नहकुल सुवेदी र बालकृष्ण ढकालको संयुक्त इजलासमा सुनुवाइ हुने तय भएको छ ।

जिल्ला अदालतबाट थप चार दिनको म्याद पाएपछि श्रेष्ठमाथिको प्रहरी अनुसन्धान भने जारी रहने भएको छ ।

Originally published on abcnews.com.np.