काठमाडौं । जल तथा मौसम विज्ञान विभागअन्तर्गतको मौसम पूर्वानुमान महाशाखाले सोमबार साँझ देशभरको मौसम सामान्यदेखि बदली रहेको जनाएको छ। महाशाखाका अनुसार लुम्बिनी, कर्णाली र सुदूरपश्चिम प्रदेशका केही स्थान तथा कोशी, बागमती र गण्डकी प्रदेशका एक–दुई स्थानमा हल्कादेखि मध्यम वर्षा भइरहेको छ।

महाशाखाले सोमबार राति पनि देशभर सामान्यतया बदली रहने पूर्वानुमान गरेको छ। हिमाली तथा पहाडी भूभागका केही स्थानमा मेघगर्जन र चट्याङसहित मध्यम वर्षा तथा हिमपातको सम्भावना रहेको जनाएको छ।

गण्डकीदेखि सुदूरपश्चिमसम्म वर्षाको सम्भावना

रातिको समयमा गण्डकी, लुम्बिनी र सुदूरपश्चिम प्रदेशका तराई भूभागका केही स्थानमा वर्षा हुने सम्भावना छ।

त्यस्तै, मधेस प्रदेश तथा कोशी र बागमती प्रदेशका तराई भूभागका थोरै स्थानमा पनि मेघगर्जन तथा चट्याङसहित मध्यम वर्षाको सम्भावना रहेको महाशाखाले जनाएको छ।

विशेषगरी गण्डकी, कर्णाली र सुदूरपश्चिमका पहाडी भूभाग तथा लुम्बिनी र सुदूरपश्चिमका तराई क्षेत्रमा एक–दुई स्थानमा भारी वर्षा हुन सक्ने पूर्वानुमान गरिएको छ।

जोखिमयुक्त क्षेत्रमा सतर्कता अपनाउन आग्रह

मौसम महाशाखाले सुन्तला रङले संकेत गरिएका सम्भावित जोखिमयुक्त क्षेत्रका बासिन्दालाई विशेष सतर्कता अपनाउन आग्रह गरेको छ।

भारी वर्षाका कारण सडक तथा हवाई यातायात प्रभावित हुनुका साथै पहाडी क्षेत्रमा पहिरो र नदी तथा खोलानालामा पानीको बहाव बढ्न सक्नेभएकाले आवश्यक सावधानी अपनाउन महाशाखाले अनुरोध गरेको छ।

विशेषगरी रातिको समयमा यात्रा गर्दा मौसमको अवस्था र सम्बन्धित निकायबाट जारी हुने सूचना हेरेर मात्र यात्रा गर्न तथा जोखिमयुक्त स्थानमा नबस्न आग्रह गरिएको छ।

Originally published on abcnews.com.np.