काठमाडौँ । बागमती प्रदेशका मुख्यमन्त्री इन्द्रबहादुर बानियाँले राजीनामा दिएसँगै नयाँ सरकार गठनको प्रक्रिया अघि बढेको छ। प्रदेश प्रमुख दीपकप्रसाद देवकोटाले संविधानको धारा १६८ को उपधारा (२) बमोजिम बहुमत जुटाउन सक्ने प्रदेशसभा सदस्यलाई बिहीबार अपराह्न ४ बजेसम्म मुख्यमन्त्रीमा दाबी पेस गर्न आह्वान गरेका छन्।

नेपाली कम्युनिस्ट पार्टी (नेकपा) र नेकपा एमालेबीच नयाँ सरकार गठनका लागि गठबन्धन गर्ने सहमति भए पनि बागमतीमा सत्ता समीकरण भने सहज देखिएको छैन। १०४ सदस्यीय प्रदेशसभामा सरकार गठनका लागि ५३ सांसदको समर्थन आवश्यक पर्छ। एमालेका २५ र नेकपाका २६ गरी गठबन्धनसँग ५१ सांसद मात्रै छन्। त्यसैले सरकार गठनका लागि थप दल वा सांसदको समर्थन जुटाउनुपर्ने अवस्था छ।

दुई दलबीचको भागबन्डाअनुसार बागमतीको मुख्यमन्त्री एमालेले पाउने सहमति भइसकेको छ। तर, मुख्यमन्त्रीको नाम टुंगो लगाउनुअघि एमालेभित्रै संसदीय दलको नेताको विवाद समाधान गर्नुपर्ने अवस्था आएको छ।

एमाले बागमती प्रदेश संसदीय दलका नेता जगन्नाथ (जेएन) थपलियाविरुद्ध १४ सांसदको हस्ताक्षरसहित अविश्वासको प्रस्ताव दर्ता भएको छ। यससँगै एमालेभित्र नेतृत्व परिवर्तनको बहस चर्किएको हो।

अविश्वासको प्रस्तावमाथि संसदीय दलमै छलफल गरी आवश्यक निर्णय गर्ने तयारी एमालेले गरेको छ। नयाँ सरकार गठनका लागि दाबी पेस गर्ने समयसीमा नजिकिँदै गर्दा दलभित्रको विवादले गठबन्धन सरकारको नेतृत्व कसले गर्ने भन्ने विषयलाई समेत अन्योलमा पारेको छ।

यही विषय टुंगो लगाउन एमालेले मंगलबार संसदीय दलको बैठक बोलाएको छ। एमाले सांसद तथा पूर्वमन्त्री किरण थापाका अनुसार २५ जना सांसदको उपस्थितिमा छलफल गरेर संसदीय दलको नेताको विषय टुंग्याउने तयारी छ।

तर, नेतृत्व चयनको प्रक्रियाबारे एमालेभित्रै फरक धारणा देखिएको छ। थापाले आपसी छलफलबाटै नेतृत्वको टुंगो लगाउने बताएका छन् भने थपलिया भने आवश्यक परे चुनावी प्रक्रियाबाट निर्णय लिन तयार देखिएका छन्।

थपलिया निकट एक सांसदका अनुसार अविश्वासको प्रस्ताव दर्ता भएकै आधारमा थपलियाले तत्काल राजीनामा नदिने, बरु संसदीय दलभित्र चुनावी प्रक्रिया भए त्यसको परिणाम स्वीकार गर्ने तयारी छ।

एमाले संसदीय दलको नेताका लागि थपलिया र थापाबीच प्रतिस्पर्धा हुने सम्भावना छ। अविश्वासको प्रस्तावमा हस्ताक्षर गरेका १४ सांसद थापाको पक्षमा देखिएका छन् भने थपलियाको पक्षमा ९ सांसद रहेको र २ जना तटस्थ रहेको बताइएको छ।

एमालेको २५ सदस्यीय संसदीय दलमा नेता चयनका लागि १३ सांसदको समर्थन आवश्यक पर्छ। त्यसैले हालको अंकगणितले थापालाई बलियो अवस्थामा देखाए पनि अन्तिम निर्णय संसदीय दलको बैठकबाटै हुनेछ।

एमाले संसदीय दलको नेता जो चयन हुन्छन्, उनैले गठबन्धनको तर्फबाट मुख्यमन्त्रीका लागि दाबी पेस गर्ने सम्भावना छ। त्यसैले बागमतीमा नयाँ सरकार गठनको पहिलो निर्णायक चरण एमालेले संसदीय दलको नेता कसलाई चयन गर्छ भन्ने बनेको छ।

सरकार गठनका लागि आवश्यक ५३ सांसदको समर्थन जुटाउनुपर्ने अर्को चुनौती भने गठबन्धनसामु कायमै छ।

Originally published on abcnews.com.np.