काठमाडौँ । मनसुनको न्यूनचापीय रेखा हाल सरदर स्थान आसपास रहेको छ। जल तथा मौसम विज्ञान विभागअन्तर्गतको मौसम पूर्वानुमान महाशाखाका अनुसार न्यूनचापीय रेखा नेपालबाट केही टाढा सरेसँगै अघिल्ला दिनको तुलनामा वर्षाको क्रम केही कम हुने देखिएको छ।

मौसमविद्हरूका अनुसार न्यूनचापीय रेखा नेपाल नजिक हुँदा वर्षाको गतिविधि बढ्ने र टाढा हुँदा वर्षा केही कम हुने गर्छ। अघिल्लो सोमबार साँझसम्म न्यूनचापीय रेखा देशको पश्चिमी क्षेत्रमा सरदर स्थानभन्दा उत्तर अर्थात् नेपाल नजिक र पूर्वी क्षेत्रमा सरदर स्थान आसपास रहेको थियो।

महाशाखाका अनुसार मंगलबार बिहान देशभर साधारणतया बदली रहेको छ। सुदूरपश्चिमका केही स्थान तथा कोसी र कर्णाली प्रदेशका एक-दुई स्थानमा हल्कादेखि मध्यम वर्षा भइरहेको छ।

दिउँसो देशभर साधारणतया बदली रहनेछ। हिमाली भूभागका केही स्थानमा मेघगर्जन र चट्याङसहित मध्यम वर्षा तथा हिमपातको सम्भावना छ। पहाडी भूभागका धेरै स्थान र तराईका केही स्थानमा पनि मेघगर्जन तथा चट्याङसहित मध्यम वर्षा हुनसक्ने महाशाखाले जनाएको छ।

कोसी प्रदेशको तराई तथा मधेस प्रदेशका केही स्थानमा हुरी चल्ने सम्भावना पनि रहेको छ।

आज राति देशभर साधारणतया बदली रहनेछ। हिमाली तथा पहाडी भूभागका केही स्थानमा मेघगर्जन/चट्याङसहित मध्यम वर्षा तथा हिमपातको सम्भावना छ। कोसी, बागमती र गण्डकी प्रदेशका तराई भूभागका केही स्थान तथा मधेस, लुम्बिनी र सुदूरपश्चिम प्रदेशका तराईका थोरै स्थानमा पनि मध्यम वर्षाको सम्भावना रहेको छ।

कोसी र गण्डकी प्रदेशका पहाडी भूभागका एक-दुई स्थानमा भने भारी वर्षाको सम्भावना रहेको महाशाखाले जनाएको छ।

यसैबीच, पछिल्लो २४ घण्टामा बझाङको थलरामा सबैभन्दा बढी ९८.८ मिलिमिटर वर्षा भएको छ। कोसी, लुम्बिनी, कर्णाली र सुदूरपश्चिम प्रदेशका केही स्थानमा मध्यम वर्षा भएको महाशाखाले जनाएको छ।

यता काठमाडौँ उपत्यकामा पनि मंगलबार वर्षाको सम्भावना रहेको मौसमविद् बिनु महर्जनले बताएकी छन्। उनका अनुसार बिहान घाम–बादलको अवस्था रहे पनि दिउँसो १/२ बजेपछि बादल बढ्दै गएर अपराह्नदेखि मध्यसम्म वर्षा हुनसक्छ।

मौसमविद्हरूका अनुसार २४ घण्टामा १० मिलिमिटरभन्दा कम वर्षा भए हल्का, १० देखि ५० मिलिमिटरसम्म मध्यम, ५० देखि १०० मिलिमिटरसम्म भारी, १०० देखि २०० मिलिमिटरसम्म धेरै भारी र २०० मिलिमिटरभन्दा बढी वर्षा भए अति भारी वर्षा मानिन्छ।

Originally published on abcnews.com.np.