कास्की । अन्नपूर्ण गाउँपालिका–११ झिनुस्थित मोदीखोला किनारमा रहेको तातोपानी कुण्ड बाढीले बगाएको छ । साउन २८ गते आएको बाढीले तीनवटा तातोपानी कुण्डसहित आसपासका संरचनामा क्षति पुर्‍याएको हो ।

सहायक प्रमुख जिल्ला अधिकारी चित्रांगत बरालका अनुसार सिमेन्ट, ढुंगा र बालुवाबाट निर्माण गरिएका तीनवटै तातोपानी कुण्ड बाढीले पूर्णरूपमा बगाएको छ । यस्तै, तातोपानी क्षेत्रको एउटा शौचालय र एउटा चेन्जिङ रुममा पनि पूर्ण क्षति पुगेको छ ।

तातोपानी कुण्ड आसपास मानव बस्ती नभएकाले घटनाबारे मंगलबार बिहान मात्रै जानकारी प्राप्त भएको प्रहरीले जनाएको छ । सूचना पाएपछि प्रहरी चौकी घान्द्रुकबाट हवल्दार राजेश भैया थारूको नेतृत्वमा दुई प्रहरी घटनास्थल पुगेर क्षतिको विवरण संकलन गरेका थिए ।

भौगोलिक रूपमा विकट क्षेत्र भएकाले घटनाको सूचना ढिलो प्राप्त भएको बरालले बताए । तातोपानी कुण्डमा पदयात्रामा जाने पर्यटकहरू नुहाउने गरेका थिए ।

बाढीले बीरेठाँटी–घान्द्रुक सडकसमेत क्षति पुर्‍याएपछि यातायात सम्पर्क विच्छेद भएको छ । मोदीखोलाको कटानका कारण बीरेठाँटीमा करिब १०० मिटर कालोपत्रे सडक बगेपछि नेपाली सेनाको सहयोगमा पुनर्निर्माण सुरु गरिएको गाउँपालिका अध्यक्ष विष्णुबहादुर केसीले बताए ।

सडक अवरुद्ध हुनुका साथै तातोपानी कुण्डका संरचना बगाउँदा त्यस क्षेत्रको पर्यटन गतिविधिसमेत प्रभावित भएको छ।

Originally published on abcnews.com.np.