काठमाडौँ । बलिउडका चर्चित गायक नवजोत आहुजा मंगलबार नेपाल आइपुगेका छन् । उनी आज (बुधबार) काठमाडौँको ठमेलस्थित क्लब नोभामा आयोजना हुने सांगीतिक कार्यक्रममा प्रस्तुति दिँदैछन् ।

क्लब नोभाले आफ्नो पहिलो स्थापना दिवसको अवसरमा आयोजना गर्न लागेको कार्यक्रममा आहुजाले प्रस्तुति दिन लागेका हुन् । उनले ‘तेरे लिए मन्दिर जाऊँ, तेरे नाम का दिया जलाऊँ’ लगायत आफ्ना लोकप्रिय गीत सुनाउनेछन् ।

‘तेरे लिए मन्दिर जाऊँ, तेरे नाम का दिया जलाऊँ’ आहुजाको चर्चित गीतमध्ये एक हो, जुन उनको ‘खत’ एल्बममा समावेश छ । त्यस्तै ‘तू ही हूँ’, ‘खुद से मोहब्बत’, ‘इंतज़ार’, ‘मेरे हो तुम’ र ‘चले गए’ लगायत उनका अन्य गीत पनि लोकप्रिय छन् ।

पहिलोपटक नेपाल आएका आहुजाले नेपाली दर्शकमाझ प्रस्तुति दिन आफू उत्साहित रहेको बताए । नेपाल आइपुगेपछि सञ्चारकर्मीसँग कुरा गर्दै उनले नेपालको संस्कृति र संस्कार आफूलाई मन परेको बताए ।

‘म पहिलोपटक नेपाल आएको छु । मलाई नेपाल मन पर्छ । यहाँको संस्कार र संस्कृति राम्रो लाग्छ,’ उनले भने, ‘नेपाली दर्शकहरूलाई गीत सुनाउन म निकै उत्सुक छु ।’

आहुजाले आफू नेपाली गीत–संगीत पनि सुन्ने गरेको बताए । नेपाली संगीतकारले गीत गाउन प्रस्ताव गरे आफू तयार रहेको उनको भनाइ छ ।

तीनदिने नेपाल भ्रमणमा आएका आहुजाले काठमाडौँका विभिन्न धार्मिक तथा पर्यटकीय स्थलको भ्रमण गर्ने कार्यक्रमसमेत रहेको छ ।

क्लब नोभाको पहिलो वार्षिकोत्सवको मुख्य कार्यक्रम आज राति ९ बजे सुरु हुनेछ । क्लबका संस्थापक विशाल तुलाचनका अनुसार कार्यक्रममा आमन्त्रित पाहुनालाई प्राथमिकता दिइएको छ ।

‘हामीले पहिलोपटक नोभाको सेलिब्रेसन गर्न लागेका छौँ । दर्शकभन्दा पनि आमन्त्रित पाहुनालाई बढी प्राथमिकता दिएका छौँ,’ उनले भने, ‘कार्यक्रममा करिब ९० प्रतिशत आमन्त्रित पाहुना र १० प्रतिशत मात्र टिकट बिक्रीका लागि राखिएको छ ।’

वार्षिकोत्सवमा गायक आहुजाको मुख्य प्रस्तुति रहनेछ ।

Originally published on abcnews.com.np.