काठमाडौं । यही भदौ ५ गतेदेखि प्रदर्शनमा आउने नेपाली चलचित्र ‘मास्टर्नी’को अग्रिम टिकट बिक्री खुला गरिएको छ। देशकै ठूलो मल्टिप्लेक्स चेन क्यूएफएक्ससहित अन्य केही मल्टिप्लेक्सले पनि चलचित्रको शो खुला गरेका छन्।

चलचित्र प्रदर्शनको तीन दिनअघि नै शो खुला गरिएको र दर्शकको मागअनुसार शो संख्या क्रमशः बढाउँदै लगिने वितरक रोहित कट्टेलले जानकारी दिए।

क्राइम थ्रिलर विधामा निर्माण भएको चलचित्रलाई केन्द्रीय चलचित्र जाँच समितिले ‘ए’ श्रेणीमा वर्गीकरण गरेको छ। यससँगै १६ वर्षभन्दा माथिका दर्शकले मात्र चलचित्र हेर्न पाउनेछन्।

सुवेन्दु घोषको निर्देशनमा तयार भएको चलचित्रमा प्रियंका कार्की, सिम्रन खड्का, प्रमोद अग्रहरी, ऋचा शर्मा, आर्यन सिग्देल, दिनेश काफ्ले, रक्षा थापा, दीपकराज गिरी, दीपाश्री निरौला र अनुपविक्रम शाहीलगायत कलाकारको अभिनय छ।

आयंका फिल्म्सको ब्यानरमा निर्माण भएको ‘मास्टर्नी’मा प्रियंका कार्की जोशी, आयुष्मान जोशी, क्याबिनेट श्रेष्ठ र प्रनित कार्कीको संयुक्त लगानी छ।

चलचित्रको कथा अभिनेत्री प्रियंका कार्कीले लेखेकी हुन् भने पटकथा शान बस्नेतले तयार गरेका छन्। संवाद लेखनमा प्रियंका र शानले सहकार्य गरेका छन्।

चलचित्रलाई आरआर फिल्म्सले देशभर वितरण गर्नेछ। रोहित शाक्य र त्रिशला गुरुङले चलचित्रका लागि संगीत दिएका छन्। पोस्टर तथा पब्लिसिटी डिजाइन ट्राइडेन्ट कन्सेप्टका लागि रोयल भीमसेन र ज्ञानु संगम खड्काले तयार गरेका हुन्।

Originally published on abcnews.com.np.