काठमाडौँ । भारतको पश्चिम बंगालस्थित कोलकाताको नयाँ बजार क्षेत्रमा रहेको एक होटलमा बुधबार बिहान आगलागी हुँदा एक बालकसहित कम्तीमा नौ जनाको मृत्यु भएको छ ।

अस्पताल स्रोतका अनुसार धुवाँका कारण निसासिएर उनीहरूको मृत्यु भएको हो । घटनामा अन्य छ जना गम्भीर घाइते भएका छन् । उनीहरूको एसएसकेएम मेडिकल कलेजमा उपचार भइरहेको छ ।

समाचार एजेन्सी एएनआईका अनुसार मृतकमध्ये उपचारका लागि कोलकाता आएका केही बंगलादेशी नागरिकसमेत रहेको बताइएको छ । यद्यपि प्रहरीले मृतकहरूको पहिचान भने औपचारिक रूपमा पुष्टि गरेको छैन ।

प्रहरीका अनुसार बुधबार बिहान करिब २ बजे होटलको तेस्रो तलाबाट आगलागी सुरु भएको थियो । आगो क्रमशः आसपासका भवनमा समेत फैलिएको थियो ।

आगलागीको सूचना पाएलगत्तै नयाँ बजार प्रहरी चौकीका प्रहरी र दमकल टोली घटनास्थल पुगेका थिए । उनीहरूले होटलभित्र फसेका व्यक्तिको उद्धार सुरु गरेका थिए ।

दमकलका एक अधिकारीले प्रारम्भिक अनुसन्धानका आधारमा सर्ट सर्किटका कारण आगलागी भएको हुन सक्ने बताए । यद्यपि आगलागीको वास्तविक कारण विस्तृत अनुसन्धानपछि मात्र खुल्ने उनको भनाइ छ ।

प्रहरीले होटलका प्रबन्धकलाई नियन्त्रणमा लिएर घटनाबारे सोधपुछ गरिरहेको छ ।

यसअघि सोमबार पनि पश्चिम बंगालको वीरभूम जिल्लास्थित तारापीठको एक होटलमा आगलागी हुँदा नौ जनाको मृत्यु भएको थियो ।

Originally published on abcnews.com.np.