काठमाडौँ । नेपाल राष्ट्र बैंकले बैंक तथा वित्तीय संस्थाबाट ३५ अर्ब रुपैयाँ बराबरको छमहिने निक्षेप संकलन गर्ने भएको छ । केन्द्रीय बैंकले १८० दिन अवधिका लागि निक्षेप संकलन उपकरणको बोलकबोल तथा निष्कासन गर्न लागेको हो ।

राष्ट्र बैंकका अनुसार बोलकबोल आज अपराह्न ३ बजेसम्म अनलाइन बिडिङ सिस्टममार्फत सञ्चालन हुनेछ । निक्षेपको ब्याजदर बोलकबोलबाट निर्धारण गरिनेछ भने साँवा तथा ब्याज आगामी फागुन ३ गते भुक्तानी गरिनेछ ।

बैंक तथा वित्तीय संस्थाले न्यूनतम १० करोड रुपैयाँदेखि अधिकतम आह्वान रकमसम्म बोली लगाउन सक्नेछन् । बोली रकम १० करोड रुपैयाँले भाग जाने हुनुपर्नेछ । राष्ट्र बैंकबाट इजाजतपत्र प्राप्त ‘क’, ‘ख’ र ‘ग’ वर्गका बैंक तथा वित्तीय संस्था मात्र बोलकबोलमा सहभागी हुन पाउनेछन् ।

बोलकबोलमा सहभागी संस्थाले आफूले निक्षेप राख्न चाहेको रकम र ब्याजदर उल्लेख गर्नुपर्नेछ । आह्वान गरिएको रकम बाँडफाँट गर्दा सबैभन्दा कम ब्याजदरलाई प्राथमिकता दिइने राष्ट्र बैंकले जनाएको छ । समान ब्याजदरका बोली परेमा ‘प्रो–राटा’ आधारमा रकम बाँडफाँट गरिनेछ ।

राष्ट्र बैंकको खुला बजार कारोबार सञ्चालन समितिले आह्वान गरिएको रकममध्ये सम्पूर्ण वा आंशिक रकमको बोल स्वीकार वा अस्वीकार गर्न सक्नेछ । स्वीकृत बोलअनुसारको रकम सम्बन्धित बैंक तथा वित्तीय संस्थाको राष्ट्र बैंकस्थित खाताबाट खर्च गरी निक्षेपको छुट्टै खातामा जम्मा गरिनेछ ।

निक्षेप उपकरण निष्कासन हुने दिन सम्बन्धित बैंक तथा वित्तीय संस्थाको राष्ट्र बैंकस्थित खातामा पर्याप्त मौज्दात नभएमा त्यस्तो संस्थालाई कालोसूचीमा राखिने र आगामी बोलकबोलमा सहभागी हुन रोक लगाइने राष्ट्र बैंकले जनाएको छ ।

भुक्तानीको मितिमा साँवा र तोकिएको ब्याज सम्बन्धित बैंकको राष्ट्र बैंकस्थित खातामा जम्मा गरिनेछ ।

राष्ट्र बैंकका अनुसार यस्तो निक्षेपलाई सम्बन्धित बोलवालाको लगानी पोर्टफोलियोमा गणना गर्न सकिनेछ । तर, अनिवार्य नगद मौज्दात (सीआरआर) मा भने गणना गर्न पाइने छैन । राष्ट्र बैंकको निर्देशनअनुसार कायम गर्नुपर्ने वैधानिक तरलता अनुपात (एसएलआर) तथा तरलता अनुपातमा भने उक्त रकम गणना गर्न सकिनेछ ।

Originally published on abcnews.com.np.