काठमाडौं । लोकप्रिय नेपाली चलचित्र ‘ऊनको स्वीटर’को सिक्वेल ‘कलेजी : ऊनको स्वीटर’मा बलिउड अभिनेता पियूष मिश्राको अभिनय रहने भएको छ ।

निर्देशक नवीन चौहानका अनुसार दसैँपछि छायांकन सुरु हुने चलचित्रमा पियूष मिश्राको प्रवेशले कथालाई थप विशेष बनाउनेछ । उनले ‘ऊनको स्वीटर’को संसार नयाँ आशा, नयाँ कथा र नयाँ यात्रासहित पुनः दर्शकमाझ फर्किन लागेको बताएका छन् ।

निर्देशक चौहानले यो चलचित्र सामान्य सिक्वेल मात्रै नभई अघिल्लो चलचित्रका पात्रहरूको जीवन र अधुरो यात्राको अर्को अध्याय हुने बताए ।

सिक्वेलमा अघिल्लो चलचित्रकै लोकप्रिय जोडी विपीन कार्की र मिरुना मगर मुख्य भूमिकामा दोहोरिने भएका छन् । त्यस्तै, एलेक्स पारस र परीक्षा लिम्बूको पनि चलचित्रमा मुख्य भूमिका रहनेछ ।

चलचित्रको लेखन नवीन चौहानले गरेका छन् भने अभिषेक सुवेदीले सहलेखन गरेका छन् । दसैँपछि छायांकन सुरु गर्ने तयारीमा रहेको चलचित्रमा पियूष मिश्राले निर्वाह गर्ने भूमिकाबारे भने निर्माण पक्षले विस्तृत जानकारी सार्वजनिक गरेको छैन।

Originally published on abcnews.com.np.