काठमाडौँ । भारतको ककरोच जनता पार्टी (सीजेपी)ले प्रधानमन्त्री मातहत रहेको पीएम–केयर्स फन्डमा रहेको रकम देशभरका सरकारी विद्यालयको विकासमा खर्च गर्न माग गरेको छ।

सीजेपीका संस्थापक अभिजीत दीपकेले फन्डमा रहेको ठूलो रकम प्रयोगविहीन अवस्थामा रहेको भन्दै यसको उपयोगबारे प्रश्न उठाएका छन्। सामाजिक सञ्जाल ‘एक्स’मार्फत उनले राष्ट्रिय आपत्कालका लागि स्थापना गरिएको पीएम–केयर्स फन्डमा रहेको रकम सरकारी शिक्षाको अवस्था सुधारमा प्रयोग गर्न सकिने बताएका छन्।

दीपकेले अर्को पोस्टमा फन्डमा रहेको ८ हजार ४५२ करोड रुपैयाँबाट ग्रामीण क्षेत्रमा रहेका कति विद्यालयको अवस्था सुधार गर्न सकिन्छ भन्ने विषयमा सोच्न आग्रह गरेका छन्।

सीजेपीका प्रवक्ता सौरव दासले पनि ८ हजार ४०० करोड रुपैयाँभन्दा बढी रकम प्रयोग नगरी राखिएको आरोप लगाउँदै विद्यालय विकासमा खर्च गर्नुपर्ने बताएका छन्। उनले फन्डको करिब ९३ प्रतिशत रकम फिक्स्ड डिपोजिटमा किन राखिएको र त्यसबाट प्राप्त हुने ब्याज कसको खातामा गइरहेको हो भन्ने प्रश्नसमेत उठाएका छन्।

हालै सार्वजनिक भएको पीएम–केयर्स फन्डको लेखापरीक्षण प्रतिवेदनअनुसार आर्थिक वर्ष २०२४–२५ को अन्त्यसम्म फन्डमा ८ हजार ४५२ करोड रुपैयाँ रहेको थियो। त्यसमध्ये ७ हजार ८४६ करोड रुपैयाँ फिक्स्ड डिपोजिटमा र करिब ६०५ करोड रुपैयाँ बचत खातामा राखिएको थियो।

प्रतिवेदनअनुसार सो आर्थिक वर्षमा पीएम–केयर्स फन्डबाट करिब ८८ लाख रुपैयाँ मात्र खर्च भएको थियो। त्यही अवधिमा फन्डले ब्याजबाट करिब ४७५ करोड रुपैयाँ आम्दानी गरेको उल्लेख छ।

Originally published on abcnews.com.np.