काठमाडौं । राष्ट्रिय स्वतन्त्र पार्टी (रास्वपा)ले आज भदौ ४ गतेदेखि ‘नागरिक, नीति र नेतृत्व’ कार्यक्रम सुरु गर्ने भएको छ।

सरकारमा सहभागी मन्त्रीलाई पार्टी कार्यालयमा उपस्थित गराई नागरिक तथा नेता–कार्यकर्तासँग प्रत्यक्ष संवाद गराउने उद्देश्यले कार्यक्रम सञ्चालन गर्न लागिएको रास्वपाले जनाएको छ। कार्यक्रमको पहिलो दिन रास्वपा उपसभापति तथा अर्थमन्त्री डा. स्वर्णिम वाग्ले पार्टीको केन्द्रीय कार्यालय चमतीमा उपस्थित हुनेछन्।

रास्वपाका अनुसार पहिलो चरणमा आमनागरिकले आफ्ना गुनासा, समस्या, सुझाव तथा अपेक्षा अर्थमन्त्री वाग्लेसमक्ष प्रत्यक्ष रूपमा राख्न सक्नेछन्। दोस्रो चरणमा मन्त्री, सांसद तथा केन्द्रीय नेतृत्वबीच नागरिकबाट प्राप्त सुझाव र समसामयिक तथा नीतिगत विषयमा छलफल हुनेछ।

यस्तो हुनेछ कार्यक्रम

रास्वपाले साँझ ५ बजेदेखि ६ बजेसम्म नागरिकसँग प्रत्यक्ष संवादको समय तोकेको छ। त्यसपछि साँझ ६ बजेदेखि ७ बजेसम्म मन्त्री, सांसद तथा पार्टीको केन्द्रीय नेतृत्वबीच छलफल हुनेछ।

पार्टीले नागरिकका आवाज, सुझाव र अपेक्षालाई सरकार तथा पार्टीको नीति निर्माण र त्यसको प्रभावकारी कार्यान्वयनसँग प्रत्यक्ष रूपमा जोड्ने उद्देश्यले कार्यक्रम सञ्चालन गर्न लागेको जनाएको छ।

पहिलो चरणमा अर्थमन्त्री वाग्ले सहभागी हुने भए पनि आगामी दिनमा सरकारमा सहभागी अन्य मन्त्रीलाई समेत पार्टी कार्यालयमा उपस्थित गराएर नागरिकसँग संवाद गराउने रास्वपाको योजना छ।

कार्यक्रममा कति नागरिक सहभागी हुन पाउने र कसलाई आमन्त्रण गरिने भन्नेबारे भने पार्टीले विस्तृत जानकारी दिएको छैन।

Originally published on abcnews.com.np.