काठमाडौँ । राष्ट्रिय स्वतन्त्र पार्टी (रास्वपा)का सांसद डा. अमरेशकुमार सिंहले प्रधानमन्त्री वालेन्द्र शाहले अख्तियार दुरुपयोग अनुसन्धान आयोगको साख कमजोर बनाउने काम गरिरहेको आरोप लगाएका छन्।

बिहीबार राज्य व्यवस्था तथा सुशासन समितिको बैठकमा बोल्दै सांसद सिंहले अख्तियार प्रधानमन्त्री मातहतको निकाय नभएको स्मरण गराए। उनले प्रधानमन्त्री वा मन्त्रीले बोलाउँदैमा अख्तियारका पदाधिकारी जान नहुने भन्दै संवैधानिक निकायको मर्यादा कायम राख्न आग्रह गरे।

‘कुनै मन्त्री वा प्रधानमन्त्रीले बोलाउँदैमा तपाईंहरू नजानुहोस्। यो समिति संसदीय निगरानी समिति भएकाले यहाँ आउन मिल्छ,’ उनले भने, ‘अख्तियार प्रधानमन्त्रीको मातहतको संस्था होइन। तपाईंहरूले त्यति हिम्मत त राख्नैपर्छ।’

प्रधानमन्त्रीले बोलाएमा लिखित रूपमा कारण माग्नुपर्ने भन्दै उनले अख्तियारका पदाधिकारीलाई सचेत गराए। अख्तियारको मर्यादा दिनप्रतिदिन खस्किँदै गएको र त्यसमा प्रधानमन्त्रीको भूमिका रहेको उनको आरोप थियो।

‘जब संस्थाको मर्यादा समाप्त हुन्छ, तब कसैले त्यसको कदर गर्दैन। प्रधानमन्त्रीकै नजरमा अख्तियारको कुनै महत्त्व छैन भने सांसदको नजरमा किन हुन्छ?’ उनले प्रश्न गरे, ‘सांसदकै नजरमा नभएपछि आम नागरिक वा गाउँका मान्छेले यसको कदर किन गर्ने?’

‘प्रधानमन्त्रीले आफ्ना मान्छे भर्ती गर्न मिल्दैन’

सांसद सिंहले प्रधानमन्त्री शाहले अख्तियारमा आफ्ना निकट व्यक्तिलाई भर्ती गर्न खोजेको आरोपसमेत लगाए। अख्तियार प्रमुखलाई बोलाएर आफूले चाहेको ठाउँमा आफ्ना मान्छे राख्न निर्देशन दिन नमिल्ने उनको भनाइ थियो।

‘प्रधानमन्त्रीले आफ्ना मान्छे भर्ती गर्न खोज्ने वा अख्तियार प्रमुखलाई बोलाएर फलानो ठाउँमा मेरा मान्छे राख्नू भन्न मिल्छ? यो त मिल्दै मिल्दैन नि,’ उनले भने।

सांसद सिंहले प्रधानमन्त्री हुँदैमा कोही राजा नहुने भन्दै गणतन्त्रमा सबै समान रहेको बताए।

‘प्रधानमन्त्री हुँदैमा कोही राजा हुँदैन र सांसद वा नागरिक हुँदैमा कोही रैती वा प्रजा हुँदैन,’ उनले भने, ‘गणतन्त्र आइसकेपछि राजा र प्रजाको यो व्यवस्था उहिल्यै समाप्त भइसकेको छ।’

उनले अख्तियारका पदाधिकारीलाई पनि आफ्नो संवैधानिक दायित्व पूरा गर्न आग्रह गर्दै संस्थाको गरिमा जोगाउन सचेत गराए।

‘मेरो एउटै मात्र भनाइ छ– अख्तियारलाई साँच्चिकै अख्तियार बन्न दिऔँ, यो संवैधानिक निकायलाई संवैधानिक निकाय नै रहन दिऔँ,’ सिंहले भने।

Originally published on abcnews.com.np.