काठमाडौं । क्यामरुनको सीमा नजिकै मध्य अफ्रिकी गणतन्त्र (सीएआर) को पश्चिमी क्षेत्रमा रहेको सुन खानीमा पहिरो जाँदा कम्तीमा १०७ जनाको मृत्यु भएको छ । दुर्घटना मंगलबार दिउँसो भएको हो ।

गारुआ–बोलाई शहरका मेयर आदमोउ अब्दोनका अनुसार खानीको एक भाग मानिसहरूमाथि खसेपछि ठूलो मानवीय क्षति भएको हो । उनका अनुसार भग्नावशेषबाट अहिलेसम्म १०७ जनाको शव निकालिएको छ । उद्धार कार्य जारी रहेकाले मृतकको संख्या अझ बढ्न सक्ने स्थानीय अधिकारीहरूले बताएका छन् ।

सार्वजनिक भएको भिडिओमा खानीको एक भाग अचानक भत्किँदा केही मानिस ज्यान जोगाउन भागिरहेको देखिएको बीबीसीले जनाएको छ ।

दुर्घटनामा मृत्यु हुनेमध्ये कम्तीमा तीन जना क्यामरुनका नागरिक रहेको क्यामरुनको पूर्वी क्षेत्रका गभर्नरले जानकारी दिएका छन् ।

घाइतेको उपचार

घटनामा घाइते भएका तथा उद्धार गरिएका व्यक्तिलाई खानीबाट करिब ५० किलोमिटर टाढा क्यामरुनको बाबुआस्थित अस्पतालमा लगेर उपचार भइरहेको एएफपीले जनाएको छ ।

स्थानीय सञ्चारमाध्यमका अनुसार दुर्घटनाको कारण पत्ता लगाउन सम्बन्धित निकायले अनुसन्धान थालेका छन् । पहिरो जानुको कारण भने अहिलेसम्म स्पष्ट हुन सकेको छैन ।

Originally published on abcnews.com.np.