किभ । युक्रेनको राजधानी किभ र आसपासका क्षेत्रमा रुसले गएराति गरेको मिसाइल आक्रमणमा कम्तीमा पाँच जनाको मृत्यु भएको छ भने २३ जनाभन्दा बढी घाइते भएका छन्।

युक्रेनको राज्य आपत्कालीन सेवा (डीएसएनएस)का अनुसार आक्रमणमा भवन तथा गोदामहरूलाई निशाना बनाइएको थियो। आक्रमणपछि भग्नावशेषमा फसेकाहरूको उद्धारका लागि उद्धार टोली परिचालन गरिएको छ। उद्धारकर्मीहरूले एक जनालाई जीवितै उद्धार गरेका छन्।

किभका मेयर भिटाली क्लिट्स्कोका अनुसार आक्रमणमा बाल अस्पतालसमेत क्षतिग्रस्त भएको छ। अस्पतालका झ्यालहरू फुटेका छन् भने आसपासमा रहेका केही सवारीसाधनमा आगलागी भएको छ।

विभिन्न क्षेत्रमा क्षति

मेयर क्लिट्स्कोका अनुसार दक्षिणपश्चिमी किभको सोलोमियान्स्की जिल्लास्थित औद्योगिक क्षेत्रलाई पनि मिसाइलले निशाना बनाएको छ।

यस्तै, किभ क्षेत्रको ब्रोभरी जिल्लामा भएको छुट्टै आक्रमणमा एक जनाको मृत्यु भएको र अर्का एक जना घाइते भएको क्षेत्रीय गभर्नर टिमुर ताकाचेन्कोले जानकारी दिएका छन्।

आक्रमणअघि क्षेत्रीय प्रशासनले स्थानीयवासीलाई सुरक्षित स्थानमा आश्रय लिन आग्रह गरेको थियो। रातभर किभसहित आसपासका क्षेत्रमा क्षेप्यास्त्र आक्रमणको चेतावनी जारी गरिएको थियो।

यसैबीच, युक्रेनमा रुसी आक्रमण जारी रहेकै बेला पोल्यान्डको सेनाले पनि सावधानीस्वरूप सैन्य हवाई कारबाही सुरु गर्ने घोषणा गरेको छ।

Originally published on abcnews.com.np.