सल्यान । नेपालीको मौलिक पहिचान, गौरव र साहससँग जोडिएको परम्परागत खुकुरी बनाउने सीप तथा व्यवसाय संरक्षणका लागि वर्ल्डलिंक कम्युनिकेसन्स लिमिटेडले सहयोग गरेको छ।

सल्यानको खलङ्गास्थित विश्वकर्मा टोलमा पुस्तौंदेखि खुकुरी निर्माण गर्दै आएका राजु विक र पार्वती विक दम्पतीलाई वर्ल्डलिंकले संस्थागत सामाजिक उत्तरदायित्व (सीएसआर) अन्तर्गत सुरक्षित कार्यस्थल निर्माण गरी हस्तान्तरण गरेको हो।

परम्परागत सीपको संरक्षणसँगै स्थानीयस्तरमा रोजगारी तथा आयआर्जनका अवसरलाई निरन्तरता दिने उद्देश्यले कार्यस्थल निर्माण गरिएको कम्पनीले जनाएको छ।

नवनिर्मित टहराले खुकुरी तथा अन्य फलामजन्य सामग्री निर्माण गर्दा घामपानीबाट जोगिनुका साथै सुरक्षित र व्यवस्थित वातावरण उपलब्ध गराउने अपेक्षा गरिएको छ।

सहयोगपछि उत्साहित राजु विकले नेपाली खुकुरी हतियार मात्र नभई पहिचान र इतिहाससँग जोडिएको बताए।

“नेपाली खुकुरी केवल एउटा हतियार मात्र नभई हाम्रो पहिचान र इतिहास हो। आवश्यक पूर्वाधार र सुरक्षित कार्यस्थलको अभावमा यो पेसा नै संकटमा पर्न लागेको बेला वर्ल्डलिंकले गरिदिएको यो सहयोगले हामीलाई व्यवसाय निरन्तरता दिन ठूलो हौसला मिलेको छ,” उनले भने।

स्थानीयका अनुसार आवश्यक लगानी र पूर्वाधारको अभावमा पछिल्लो समय यस्ता मौलिक तथा परम्परागत सीप लोप हुने अवस्थामा पुगेका छन्। वर्ल्डलिंकको सहयोगले स्थानीय सीप संरक्षण, परम्परागत व्यवसायको निरन्तरता र आत्मनिर्भर जीविकोपार्जनमा योगदान पुग्ने उनीहरूको भनाइ छ।

वर्ल्डलिंकले समुदायको आवश्यकता पहिचान गरी सामाजिक तथा आर्थिक रूपमा पछाडि परेका समुदायको सीप संरक्षण, व्यवसाय प्रवर्द्धन तथा दिगो जीविकोपार्जनका लागि विभिन्न सामाजिक उत्तरदायित्वका कार्यक्रम सञ्चालन गर्दै आएको जनाएको छ।

टहरा हस्तान्तरण कार्यक्रममा स्थानीय जनप्रतिनिधि, समुदायका सदस्य तथा वर्ल्डलिंकका प्रतिनिधिको सहभागिता थियो। कार्यक्रममा वक्ताहरूले परम्परागत सीपलाई नयाँ पुस्तासम्म हस्तान्तरण गर्दै स्थानीय मौलिकता जोगाउन निजी क्षेत्र, सरकार र समुदायबीचको सहकार्य आवश्यक रहेकोमा जोड दिए।

Originally published on abcnews.com.np.