धनुषा । नापजाँच सम्पन्न भएको करिब १० वर्षपछि धनुषाका ३१० परिवारले जग्गाधनी प्रमाणपुर्जा (लालपुर्जा) प्राप्त गरेका छन्।

नापी कार्यालय धनुषाले मिथिला बिहारी नगरपालिका–३ का ३१० परिवारलाई जग्गाधनी प्रमाणपुर्जा वितरण गरेको हो।

साविक मिथलेश्वर महुवाही वडा नं. १ देखि ९ सम्मका स्ववासी जग्गाको नापजाँच आर्थिक वर्ष २०७२/७३ मा सम्पन्न भएको थियो। नापजाँच सकिए पनि जग्गा दर्ताका लागि आवश्यक जनसहभागिता न्यून हुँदा लालपुर्जा वितरण प्रक्रिया लामो समयसम्म रोकिएको थियो।

नापी कार्यालय धनुषाका अनुसार आयोगबाट नापनक्सा भइसकेका जग्गाको आवश्यक प्रक्रिया पूरा गरी अहिले जग्गाधनी प्रमाणपुर्जा वितरण गरिएको हो।

कार्यालयले नापजाँच सम्पन्न भए पनि विभिन्न प्रक्रियागत कारण र स्थानीयको न्यून सहभागिताका कारण लामो समयसम्म पुर्जा वितरण हुन नसकेको जनाएको छ। पछिल्लो समय आवश्यक प्रक्रिया पूरा भएपछि स्थानीयवासीले करिब एक दशकपछि आफ्नो जग्गाको कानुनी स्वामित्व प्रमाणित गर्ने लालपुर्जा प्राप्त गरेका हुन्।

Originally published on abcnews.com.np.