काठमाडौं । उडान स्टुडियोको प्रस्तुतिमा निर्माण भएको नेपाली फिल्म ‘आशा’को छायांकन सम्पन्न भएको छ। निर्मात्री शर्मिला थापाका अनुसार एक महिनाको अवधिमा फिल्मको छायांकन पूरा गरिएको हो।

फिल्मको छायांकन काठमाडौं उपत्यकासहित नमोबुद्ध र धुलिखेल क्षेत्रमा गरिएको छ। छायांकन सम्पन्न भएसँगै निर्माण टोली पोस्ट प्रोडक्सनको काममा जुटेको छ।

निर्मात्री थापाले योजना अनुसार नै छायांकन सम्पन्न भएको बताउँदै कलाकार तथा प्राविधिकको मेहनतले निर्धारित समयमै काम पूरा गर्न सफल भएको जानकारी दिइन्।

“हामी योजना अनुसार नै छायांकन सम्पन्न गरेर पोस्ट प्रोडक्सनको काम सुरु गर्दै छौँ। कलाकार र प्राविधिकहरूको मेहनतले गर्दा हाम्रो योजनाअनुरुप सबै काम समयमै सम्पन्न भएको छ,” उनले भनिन्।

उनले नेपालीपन बोकेको कथालाई प्राविधिक रूपमा अब्बल बनाएर दर्शकमाझ ल्याउने बताइन्।

प्राविधिकलाई ५१ हजार सहयोग

फिल्मको इन्डक्ल्याप समारोहमा निर्मात्री थापाले फिल्मका प्राविधिक अर्जुन घिमिरेलाई ५१ हजार रुपैयाँ सहयोग गरेकी छन्।

फिल्ममा स्पोटब्वाईका रूपमा काम गरिरहेका घिमिरेकी श्रीमती ब्लड क्यान्सरबाट पीडित रहेको जानकारी पाएपछि थापाले पारिश्रमिकबाहेक उपचार खर्चका लागि उक्त रकम सहयोग गरेकी हुन्।

को–को छन् कलाकार?

‘आशा’मा शुशांक मैनाली, महेश त्रिपाठी, अन्जना बराइली, सुशील सिटौला, आशान्त शर्मा, केनिपा सिंह र कविता रेग्मीको अभिनय रहेको छ। बालकलाकारतर्फ चिराग श्रेष्ठ र काश्वी भण्डारीले अभिनय गरेका छन्।

फिल्मको कथा तथा निर्देशन राजिव गुरुङले गरेका हुन्। फिल्म आगामी माघ १ गतेदेखि प्रदर्शनमा आउने निर्माण पक्षले जनाएको छ।

Originally published on abcnews.com.np.