काठमाडौँ । नेपाली लोकसंगीत र दोहोरीको माहोललाई थप रौनकपूर्ण बनाउने उद्देश्यसहित तीनदिने ‘लोकदोहोरी मेला’ आजदेखि काठमाडौँको जमलस्थित टप दरबार रोधी क्लबमा सुरु हुँदैछ। क्लबको ग्रान्ड ओपनिङको अवसर पारेर आयोजना गरिएको मेलामा लोकदोहोरी, संगीत तथा नेपाली चलचित्र क्षेत्रका चर्चित कलाकार र व्यक्तित्वहरूको बाक्लो उपस्थिति रहने आयोजकले जनाएको छ।

भदौ ५ गतेदेखि ७ गतेसम्म सञ्चालन हुने मेलाको पहिलो दिन अभिनेता भुवन केसी, दिनेश डीसी, दुर्गेश थापा, नीर शाह, शिव श्रेष्ठ, ज्योति मगर, कृष्ण कँडेल, दुर्गा रायमाझी, नारायण रायमाझी, रीता थापा, प्रेम लोचन, सम्झना लामिछाने, सुरेश अधिकारी, पुष्कल शर्मा र चन्द्र शर्मालगायत कलाकार तथा विशिष्ट व्यक्तित्व सहभागी हुनेछन्।

लोकसंगीतदेखि प्रत्यक्ष दोहोरीसम्म

तीन दिनसम्म चल्ने मेलामा लोकदोहोरी क्षेत्रका चर्चित कलाकारहरूको प्रत्यक्ष सांगीतिक प्रस्तुति, दोहोरी कार्यक्रम तथा विभिन्न सांस्कृतिक गतिविधि सञ्चालन हुनेछन्।

टप दरबार रोधी क्लबमा नियमित रूपमा आबद्ध करिब ६० जना कलाकारले समेत विशेष प्रस्तुति दिने आयोजकले जनाएको छ। स्थापित कलाकारसँगै नयाँ पुस्ताका प्रतिभालाई पनि एउटै मञ्चमा प्रस्तुत गर्ने मेलाको मुख्य उद्देश्य रहेको बताइएको छ।

‘रोधीलाई व्यवस्थित र पारिवारिक बनाउन खोजेका छौँ’

टप दरबार रोधी क्लबका सञ्चालक अशोक गिरीले आफू करिब २५ वर्षदेखि दोहोरी तथा रोधी क्षेत्रमा सक्रिय रहेको उल्लेख गर्दै नयाँ र स्थापित दुवै पुस्ताका कलाकारलाई जोड्ने उद्देश्यले मेला आयोजना गरिएको बताए।

उनले भने, “यो अवधिमा धेरै कलाकारलाई आफ्नो प्रतिभा प्रस्तुत गर्ने अवसर दिन सकेँ। अब टप दरबार रोधीमार्फत नेपाली लोकसंगीत र कलाकारितालाई अझ व्यवस्थित ढंगले अगाडि बढाउने हाम्रो प्रयास हो।”

गिरीका अनुसार रोधीलाई केवल मनोरञ्जनको केन्द्रका रूपमा नभई नेपाली लोकसंस्कृति, संगीत, कलाकार र दर्शकबीचको साझा गन्तव्यका रूपमा विकास गर्ने लक्ष्य राखिएको छ।

उनले रोधी तथा दोहोरी व्यवसायप्रति रहेको परम्परागत धारणालाई परिवर्तन गर्दै यस क्षेत्रलाई सभ्य, व्यवस्थित र पारिवारिक वातावरणमा अगाडि बढाउनुपर्ने बताए।

“रोधी भनेको केवल मनोरञ्जन गर्ने ठाउँ मात्र होइन, हाम्रो लोकसंस्कृति र संगीतसँग जोडिएको एउटा परम्परा पनि हो,” उनले भने।

७ करोड लगानी, सयभन्दा बढीलाई रोजगारी

करिब ७ करोड रुपैयाँ लगानीमा सञ्चालनमा आएको टप दरबार रोधी क्लबमा एकपटकमा करिब २०० जना अट्न सक्ने क्षमता रहेको छ। क्लबले प्रत्यक्ष रूपमा १०० भन्दा बढीलाई रोजगारी दिएको जनाएको छ।

नेपाली मौलिक परिकार, प्रत्यक्ष सांगीतिक प्रस्तुति, आधुनिक प्रविधि, स्तरीय सेवा र पारिवारिक वातावरणलाई क्लबका प्रमुख विशेषताका रूपमा विकास गरिएको छ।

आयोजकका अनुसार मेलाको मुख्य उद्देश्य नेपाली मौलिक लोकसंगीत, कला र संस्कृतिलाई नयाँ पुस्तासम्म पुर्‍याउनुका साथै नयाँ प्रतिभालाई स्थापित कलाकारसँगै आफ्नो क्षमता प्रदर्शन गर्ने अवसर उपलब्ध गराउनु हो।

टप दरबार रोधी क्लबको ग्रान्ड ओपनिङ तथा लोकदोहोरी मेला भदौ ७ गतेसम्म हरेक दिन साँझ ७ बजेदेखि बिहान ४ बजेसम्म सञ्चालन हुनेछ।कार्यक्रम जमलस्थित विश्वज्योति मलको चौथो तलामा आयोजना गरिएको छ।

Originally published on abcnews.com.np.