पर्वत । हरितालिका तीजको अवसरमा बुहारी ग्रुप अफ नेपालले डिजिटल प्रणालीमा आधारित खुला तीज गीत तथा भिडियो प्रतियोगिता आयोजना गर्ने भएको छ।

‘बदलिँदो समाज, बदलिँदो तीज’ भन्ने नारासहित आयोजना हुने प्रतियोगितामा नेपाल तथा विदेशमा रहेका नेपालीले सहभागिता जनाउन सक्नेछन्। प्रतियोगितामा सहभागी हुन कुनै शुल्क लाग्ने छैन।

आयोजकका अनुसार एक समूहमा न्यूनतम पाँचदेखि अधिकतम १० जनासम्म सहभागी हुन सक्नेछन्। प्रतियोगिताका लागि तयार गरिने भिडियो चारदेखि छ मिनेटसम्मको हुनुपर्नेछ।

प्रतियोगितामा सहभागी हुन इच्छुक समूहले आफ्नो भिडियो २०८३ भदौ १० गते राति १० बजेसम्म ह्वाट्सएपमार्फत पठाउनुपर्नेछ। भिडियो पठाउँदा समूहको नाम, ठेगाना र सम्पर्क व्यक्तिको विवरण अनिवार्य रूपमा खुलाउनुपर्ने आयोजकले जनाएको छ।

सामाजिक सञ्जालमा यसअघि नै सार्वजनिक भइसकेका भिडियो भने प्रतियोगितामा सहभागी गराउन पाइने छैन। मौलिक तथा नयाँ सिर्जनामा आधारित भिडियो मात्रै स्वीकार गरिने बुहारी ग्रुप अफ नेपालकी संयोजक लक्ष्मी तिवारीले बताइन्।

प्रतियोगितामा प्रथम हुने समूहले २० हजार रुपैयाँ, द्वितीयले १५ हजार, तृतीयले १० हजार र सान्त्वना हुने समूहले पाँच हजार रुपैयाँ नगद पुरस्कारसहित प्रमाणपत्र प्राप्त गर्नेछन्।

तिवारीका अनुसार प्रतियोगितामा भिडियोको मूल्याङ्कन गर्दा निर्णायक मण्डलको निर्णयलाई ८० प्रतिशत र फेसबुक पेजमा प्राप्त लाइक, कमेन्ट तथा शेयरलाई २० प्रतिशत आधार बनाइनेछ।

तीज पर्वको मौलिकता, सामाजिक सन्देश र बदलिँदो परिवेशलाई सिर्जनात्मक रूपमा प्रस्तुत गर्ने उद्देश्यले प्रतियोगिता आयोजना गरिएको आयोजकले जनाएको छ। नेपालमा मात्रै नभई विदेशमा रहेका नेपालीलाई समेत तीजको सांस्कृतिक उत्सवसँग जोड्ने लक्ष्य प्रतियोगिताले लिएको छ।

बुहारी ग्रुप अफ नेपालले इच्छुक समूह तथा व्यक्तिहरूलाई प्रतियोगितामा सहभागी भई आफ्ना सिर्जनात्मक प्रस्तुति प्रस्तुत गर्न आह्वान गरेको छ।